SA moet eintlik dankbaar wees vir beurtkrag, sê minister
Apr 01 2008 08:03:36:020PM  - (SA)  

Druk artikel  E-pos storie aan 'n vriend

Suid-Afrikaners moet eintlik dankbaar wees vir voorkomende beurtkragmaatreëls, het me. Buyelwa Sonjica, minister van minerale en energie, gister by die Randse Skou, suid van Johannesburg, gesê.

“Voorkomende beurtkrag is ’n poging om die negatiewe impak (van kragonderbrekings) te verminder en dit meer voorspelbaar te maak,” het sy gesê.

Voorkomende beurtkrag het gister begin sodat Eskom herstelwerk kan afhandel voor 1 Mei, wanneer die winterkoue aanvraag begin opstoot.

Vir dié herstelwerk het Eskom 3 000 MW nodig. Groot nywerheidkliënte gebruik 1 600 MW minder as voorheen en kommersiële en “ ’n klein aantal huishoudelike kliënte” spaar saam sowat 400 MW. Eskom moes dus gister nog 1 000 MW uit die stelsel haal deur beurtkrag toe te pas, het mnr. Andrew Etzinger, Eskom se hoofbestuurder van aanvraagbestuur, gesê.

Dié voorkomende beurtkrag sou reeds eergister begin, maar is met ’n dag uitgestel omdat Eskom wou seker maak dit is “absoluut noodsaaklik”.

“Mnr. Jacob Maroga (Eskom se uitvoerende hoof) het die naweek verskeie navrae van Eskom-direkteurs en regeringsdepartemente ontvang. Die vergaderings (vir eergister) is belê om seker te maak ons aanvanklike aannames (op grond waarvan die besluit geneem is) is reg.”

Sonjica het gister weer gevra dat mense moet help om energie te spaar. “Dis al wat ons kan doen om ’n verskil te maak.”

Volgens Sonjica is dit omdat die elektrisiteit in Suid-Afrika so “goedkoop” is, dat Suid-Afrikaners dit onverantwoordelik gebruik en nie genoeg bespaar nie.