Diesel-lokomotiewe staan reg as elektriese treine nie werk
Apr 09 2008 08:45:22:860PM  - (SA)  

Druk artikel  E-pos storie aan 'n vriend

Mnr. Jeff Radebe, minister van vervoer, by die departement se 2010-vorderingsvoorlegging wat gister in Pretoria gehou is. Foto: Cornél van Heerden

Altesame 190 diesellokomotiewe gaan in 2010 tydens die Wêreldbeker-sokkertoernooi gereed staan, ingeval iets fout gaan met die elektriese lokomotiewe van Metrorail-treine waarin toeskouers rondgekarwei gaan word.

Transnet gaan sowat R200 miljoen bestee om dié lokomotiewe op te knap.

Só het mnr. Kuben Pillay, waarnemende direkteur-generaal van openbare vervoer, gister gesê tydens die nasionale departement van vervoer se 2010-vorderingsvoorlegging wat deur die minister van vervoer, mnr. Jeff Radebe, bekendgestel is.

Die diesellokomotiewe sal in geval van ’n kragonderbreking kort voor ’n wedstryd moet inspring om toeskouers betyds by stadions te kry. Alle belangrike stasies is glo ook met kragopwekkers toegerus, sodat die werking van treine nie belemmer word nie. Luidens die voorlegging bied die Wêreldbeker aan Suid-Afrika die geleentheid om die pas waarteen die land se vervoerstelsel verbeter word, te versnel. Minstens R178 miljard gaan oor die volgende vyf jaar op die ontwikkeling en verbetering van vervoerstelsels bestee word.

Dít sluit onder meer in padinfrastruktuur, die Gautreinprojek, lughawe-ontwikkelings, openbare vervoer en die verbetering van spoornetwerkte. Luidens die departement se voorlegging gaan bestuurders van taxi’s met betaalmeters in ook opleiding in bestuursvernuf, kliëntediens en algemene inligting vir toeriste ontvang. – Alet van Zyl en Carina van Wyk

Teken in op Beeld

Kry Beeld op jou Facebook-profiel

Kry nuus op jou selfoon by www.beeld.mobi