Klappe verskuil, maar g’n name
Dec 16 2007 10:35:58:963PM - (SA)
Polokwane (Pietersburg). – In ’n kwalik verskuilde dwarsklap na sy teenstander in die leierswedloop, mnr. Jacob Zuma, het pres. Thabo Mbeki afgevaardigdes gevra om die “morele slaankrag” van die ANC-beweging te herstel deur dit te beskerm teen “die verradelike lokmiddels van korrupsie, voortrekkery en magshonger”.
Mbeki het in sy openingsrede herhaaldelik na Zuma gekap met talle verwysings na etiese en morele waardes en hoe die leierskap van die ANC sulke waardes moet vergestalt.
Hy het egter nêrens in sy toespraak Zuma by die naam genoem nie.
In nog ’n stelling wat geïnterpreteer kan word as van toepassing op Zuma, het Mbeki gesê die ANC beywer hom in die stryd teen “verkragting, seksuele mishandeling, en gesinsgeweld”.
Mbeki het ook sy afkeer van “die voortbestaan van seksisme, patriargale houdings en gebruike binne die party” in sy toespraak verwoord.
– Abigail Isaacs
Teken in op Beeld
Kry Beeld op jou Facebook-profiel
Kry nuus op jou selfoon by www.beeld.mobi
|
