Kies jou skool se provinsie
|
||||
|
|
|
||
| Jou wêreld, Jou koerant | ||||
|
||||
|
|
|
||
| Jou wêreld, Jou koerant | ||||
|
Vennote
|
|
Sny op Alwyn se kuit kos aflosspan duur
Beijing - Die Suid-Afrikaanse 4 x 400 meter-aflosspan was gisteraand hier op die Olimpiese Spele net nie vinnig genoeg om tot die eindronde deur te dring nie. Dié span, bestaande uit Pieter Smith, Ofentse Mogawane, Alwyn Myburgh en LJ van Zyl, het sesde in sy uitdun geëindig met ’n tyd was 3:01.26. Dit was 0.58 sekondes vinniger as waarmee Suid-Afrika in 2006 op die Statebondspele in Melbourne die silwermedalje verower het. In gister se uitdunne was dit slegs die negende vinnigste tyd. As die Suid-Afrikaners net 0.48 s vinniger gehardloop het, was hulle deur tot die eindronde. Alwyn Myburgh het agterna ná ’n lang sny op sy regterkuit gewys. “Ek dink dit het ons daardie kosbare honderdstes van ’n sekonde gekos. Ek weet nie wie dit was nie, maar ek is eers deur ’n ander atleet gestamp. Ek het skaars tot verhaal gekom, toe ’n ander atleet se spykerskoene my kuit getref het. My ritme was weer versteur. “Maar ek kla nie, want dit is maar soos dit in aflosse gaan. Natuurlik is ons teleurgesteld, maar ons hoef ons nie te skaam nie. “Ons tyd was een van die vinnigstes deur ’n Suid-Afrikaanse span.” Die Suid-Afrikaanse rekord van 3:00.20 pryk sedert 1999 op die rekordboeke. Van Zyl, wat in 2006 in Melbourne sy span se groot held was ná ’n ongelooflike eindpoging, sê hy het sy bes gegee, maar hy kon nie die voorlopers inhaal nie. Daar wag ’n besige tydjie op Van Zyl. Hy vertrek vandag na Europa waar hy aan drie Goue Liga-byeenkomste en die Grand Prix-eindronde in Stuttgart deelneem. Van Zyl maak geen geheim van sy doelwit nie. “Ek gee nie om waar ek in my wedlope eindig nie, solank dit net beter as vyfde is.” Mogawane, wat ook in Melbourne goud geproe het, meen die noodlot het hom ’n streep getrek. “Ek weet nie hoekom ek nou juis siek moes word nie. Ek is op antibiotiese behandeling en nie op my beste nie.” Mogawane het gisteraand die tweede been gehardloop. Hy het goed begin en was ’n rukkie lank tweede. Sy bene het pap geraak en hy het tot die sesde plek teruggesak. “Ek kon nie anders nie. Ek het aan my spanmaats gesê ek gaan die wedloop soos ’n man aanpak en hoop vir die beste.” Die VSA het die uitdun waarin Suid-Afrika gehardloop het, in 2:59.98 gewen. Brittanje het sy uitdun in 2:59.33 gewen.
|
|||||||||||||||||||||
 |
|||||||||||||||||||||
|
|||||||||||||||||||||
|
vind
vind jou ou skoolvriende
Kies jou skool se provinsie |
|
|
