Ma, dogter rou saam oor hul lewensmaats ná gru-mynongeluk
May 07 2008 10:03:57:440PM  - (SA)  

Druk artikel  E-pos storie aan 'n vriend

Me. Nicolene Goosen en haar ma, mev. Nieksie du Plessis, saam met Goosen se dogter, Delene (16 maande) het gister die roudiens by die South Deep-myn bygewoon. Albei het mnr. Reinecke en Norman goed geken. Foto: Johann Hattingh

’n Wes-Randse ma en dogter rou saam oor die dood van hul lewensmaats ná die grusame ongeluk by Gold Fields se South Deep-myn wat verlede week die lewe van 10 mynwerkers binne 48 uur geëis het.

Mev. Pat Reinecke en haar dogter, mev. Margaret Norman van die Hillside-hoewes in Randfontein, het mnr. Frikkie Reinecke (55) en mnr. Matt Norman (32), ’n Australiër van geboorte, in die ongeluk op Werkersdag aan die dood afgestaan.

Margaret en Matt is vyf maande gelede getroud.

“Hy het altyd so mooi vir my gesing,” het me. Tessa Verbeek (18), ’n huisvriend van die Reineckes, gister aan Beeld gesê.

Meer as 3 000 werknemers van die maatskappy het gister die roudiens bygewoon.

Reinecke en Norman, albei loodgieters, is saam met me. Jennifer Bahlekazi (26) van Glenharvie en ses ander mans dood.

Me. Bahlekazi het as hyseroperateur by die Gold Fields-myngroep gewerk.

Die hyser waarin dié nege was, het sowat 60 m onder vlak 105 (sowat 2 882 m ondergronds) na die skagbodem geval toe ’n hyserkabel gebreek het.

Die agt mans was almal werknemers van Murray & Roberts Cementation.

Die ander oorledenes was mnre. Frederick Labuschagne (52) van Rustenburg, Phahlone Mishack Shabangu (48) van Sebokeng, Daniël Cuna (25) van Limpopo en Sidney Botha (42) en Jan Anton Peens (35) van Fochville en Gilliam (Gielie) Johannes Coetzee (37), ook van Randfontein.

Mnr. Abel Magane, vir wie gister se roudiens ook was, is op 29 April by South Deep-myn dood toe ’n seismiese skudding ’n rotsstorting veroorsaak het.