Tuinier val bejaarde glo aan toe hy kos bring
May 09 2008 10:01:47:937PM  - (SA)  

Druk artikel  E-pos storie aan 'n vriend

’n Sewentigjarige man het gister in Dunstanstraat in Queenswood, Pretoria, hard teruggebaklei toe sy tuinier van die afgelope agt maande hom na bewering aangerand en in die badkamer probeer ophang het.

Insp. Klaas van der Kooi, polisiewoordvoerder, het gesê die voorval het omstreeks 10:30 plaasgevind.

“Die ou man het vir die tuinier kos geneem. Toe hy die deur oopmaak en die bord vir die tuinier uithou, het die tuinier die mes op die bord gegryp en die ou man daarmee in die bolyf probeer gesteek.

“Die twee het begin stoei.”

Volgens van der Kooi het die bejaarde hard teruggebaklei. “Die tuinier het hom egter tot in die badkamer gesleep waar hy hom probeer ophang het, maar hy het nie daarin geslaag nie.

“Die tuinier het toe met ’n onbekende bedrag geld gevlug,” het Van der Kooi gesê.

Mnr. Nick Dollman, woordvoerder van Netcare 911, het gesê nooddienswerkers was binne vier minute op die toneel.

“Die man is in die linkerhand en naby sy regterknie gesteek. Daar was ’n tou met ’n lus naby die slagoffer.”

Die bejaarde man is op die toneel behandel en toe na die Netcare Moot-hospitaal geneem.

Van der Kooi het gesê die polisie ondersoek die voorval en hoop om die tuinier binnekort aan te keer. – Virginia Keppler

Teken in op Beeld

Kry Beeld op jou Facebook-profiel

Kry nuus op jou selfoon by www.beeld.mobi