Monnas wys hy kan
May 01 2008 09:07:43:030AM  - (SA)  

Druk artikel  E-pos storie aan 'n vriend

Die vaskopvoorry van Monnas se eerste span, Ruan Dreyer, tydens een van sy talle kraglopies. Foto: Marius Nortjé

Ná Monnas se eerste rugbyspan verlede jaar twee keer die knie voor die Hoërskool Eldoraigne, Centurion, moes buig, het hulle uiteindelik Saterdag in die NuPower Tuks- kwarteindronde sukses behaal.

Die Hoërskool Monument het die kampioen, Eldoraigne, met 16-5 by die Hoërskool Marais Viljoen in Alberton geklop.

Die ingeoefende skopskoen van Christo Potgieter, Monnas se losskakel, het die telbord aan die rol gesit met ’n uitstekende strafskop in die 14de minuut van die eerste helfte.

Monnas se klein generaaltjie agter die skrum, kaptein Whestley Moolman, het in die 20ste minuut met ’n stukkie briljante spel vorendag gekom. Hy het van die halflyn af sowat ses verdedigers van Eldoraigne geklop en heen en weer oor die veld gehardloop tot reg langs die doelpale waar hy ’n welverdiende drie gedruk het.

Wilken Odendaal van Eldoraigne het kort daarna agter Monnas se doellyn besoek afgelê en Monnas se Potgieter het net voor rustyd met nog ’n strafdoel geslaag. Die telling was teen halftyd 13-5 in Monnas se guns.

Tydens die tweede helfte het albei spanne hul lywe op die spel geplaas, maar nie een kon daarin slaag om deur hul teenstanders se verdedigingslinies te breek nie.

Eers in die 26ste minuut van die tweede helfte het Christo Potgieter losgetrek en ’n briljante skepskop tussen die pale deurgestuur. Dit het die wedstryd in Monnas se guns beklink.