Boer pleit by ANC-regering
2002-06-12 12:06
'n Vrystaatse grensboer van wie diewe uit Lesotho op een aand 44 duur ramme gesteel het, het in 'n emosionele pleidooi die ANC-regering gevra om blanke boere nie te vergeet nie, voordat boere "self misdadigers word en begin om veediewe te skiet".
Volksblad doen verslag.
Mnr. Hennie Cronjé het aan mnr. Mann Oelrich, LUR vir landbou en grondsake, gesê die regering verwag van die boere om grondbelasting te betaal, maar die geldelike posisie van die Vrystaatse boer word oorskat.
"Moenie omdat ons blanke boere is, vergeet ons is ook boere in hierdie land nie. Vergeet van die kleur van ons vel. Ons vra die ANC-regering: Asseblief, doen iets! Ons blanke boere is ook deel van die nuwe Suid-Afrika.
"As niks gedoen word nie, gaan die boere ook misdadigers word en begin om veediewe te skiet."
Cronjé, voorsitter van die Boesmanskop-boerevereniging, se stelling het gevolg ná 'n hewige debat tussen Oelrich en grensboere wat keelvol vir die grenskrisis is.
Oelrich, wat self 'n emosionele beroep op boere gedoen het om te help om armoede hok te slaan en te waak daarteen om in 'n gemaksone te beweeg omdat hulle "enorme hoeveelhede hektaar besit", is van "politiekery" beskuldig.
Boere van Wepener, Vanstadensrus, Boesmanskop en Zastron het die vergadering deur Vrystaat Landbou (VL) belê om met Oelrich en mnr. Benny Kotsoane, LUR vir veiligheid en sekuriteit, oor die toenenemde grensprobleme te praat.
Boere soos mnr. Smithie Bekker van Vanstadensrus het die afgelope jaar reeds meer as 250 skape verloor en mnr. Fred Smith van Wepener 212.
Feitlik daagliks word skape, beeste, bakkies, trekkers ploeë en heinings weggedra. Boere word met die dood gedreig as hulle durf ingryp óf hul plase word afgebrand. Tot 17 veldbrande is in een nag in hierdie gebied gestig.
Cronjé se 44 Döhne-merinoramme van tussen R2 000 en R3 000 elk is in een trop van sy plaas reguit tot in Lesotho aangejaag, terwyl al die heinings oor drie plase afgeknip is. Die meeste plase aan die grens hier lê leeg; veeboerdery is onmoontlik.
Lees die volledige berig in Volksblad.
- Volksblad