’n Warm ontvangs vir nuweling
Oct 04 2008 01:54:23:067AM  - (SA)  

Druk artikel   E-pos storie aan 'n vriend

Geluk met die inisiatief, oorspronklikheid en innoverende denke. Dis die taal van iemand wat die heuningkwas wel benut.

Dit verg vooraf baie beplanning en besinning wat die gedagte laat realiseer het. Om ’n baba in die wêreld te bring, is ongeveer ’n nege-maande-proses.

Om ’n nuwe bylae die lig te laat sien, is ook ’n proses.

Dit is seker die kortste deel. Om ’n baba “groot” te maak, kos jare se opvoeding en blywende versorging.

Daarom wil ek en my eggenote vertrou dat dié begin sal lei tot ’n volhoubare proses en dat u baie hoogtes sal bereik.

Ek lees Volksblad sedert Januarie 1965 en het later ’n intekenaar geword.

Ek neem sommer die vrymoedigheid om u denke te stimuleer met ’n paar voorstelle.

U kan dit maar afskiet.

Kan u nie “kort” berigte oor stokperdjies van lesers plaas nie?

Kan u nie ’n personeellid aanwys om “klagtes” of hulp wat gevra word met waterlekkasies, te ontvang nie?

Dieselfde inligting kan gevra word oor byvoorbeeld slaggate, ligte wat uit is en so meer.

Kan ons nie ’n bietjie meer lag of dit regkry dat mense meer positief glo, positief dink en handel nie?

Sulke berigte kan handel oor “skades en skandes”.

Iets wat mense persoonlik ervaar het.

Die skrywer moet emosioneel volwasse wees om met homself te kan spot. (Moet net nie met my spot nie.)

Oupa Lombaard

Teken in op Volksblad