Twee halwe ANC’s is beter as een, maar...
Nov 20 2008 12:08:13:893AM  - (SA)  

Druk artikel   E-pos storie aan 'n vriend

Die voordeel van die huidige politieke situasie ten opsigte van die ANC lê in die skeuring en nie in enige van die twee kampe nie. Dit sal verhoed dat die ANC in die komende verkiesing ’n 70%- meerderheid kry en kan maak wat hulle wil. Die ANC kan selfs tot onder ’n meerderheid van 50% gedruk word indien Cope van mnr. Mosiuoa Lekota 20% kan realiseer wat dan koalisieregering ’n werklikheid maak.

Die Cope van mnr. Lekota is niks anders nie as die ANC in ’n ander gewaad. Lekota het by herhaling verklaar dat sy nuwe party eintlik die ware ANC is en dat hulle by die ANC se Vryheidsmanifes en beginsels staan. As premier van die Vrystaat was dit Lekota wat dr. H.F. Verwoerd se standbeeld laat afbreek en toegelaat het dat daar op die standbeeld getoi-toi word. As minister van verdediging het hy die vier kuratore by die Oorlogmuseum in Pretoria, deur militêre polisie in hegtenis laat neem.

Onder sy ministerskap van verdediging is die kommandostelsel afgeskaf. In die ANC het hy geswyg oor Julius Malema en andere se haatspraak. Binne Cope sit Lekota met radikale elemente soos Papi Kganare en andere uit die SAKP en Cosatu. Daar is dus geen heil vir Afrikaners by Lekota nie, die heil lê slegs in die skeuring van die ANC.

Kiesers moet vir die politieke party stem wat hul beginsels, ideale en strewes sal verteenwoordig. Daardie politieke partye sal dan in ’n moontlike koalisieregering daardie beginsels, ideale en strewes kan opeis en afdwing.

Teken in op Volksblad