Argitekte bied opwindende feestoere
Jun 29 2007 07:08:09:013PM  - (SA)  
jan ras

Druk artikel   E-pos storie aan 'n vriend

Argitektuur met mening! Vanjaar, tydens die Volksblad–kunstefees, bied die Vrystaatse Instituut van Argitekte (VIA) twee baie spesiale lesings aan. Die twee sprekers is mnre. Anton Roodt van Bloemfontein en Stefan Antoni van Kaapstad. Albei sprekers is werklik meesters van argitektuur.

Argitektuur word soms die moeder van die kunste genoem. Die VIA plaas graag die fokus op argitektuur deur die aanbieding van die Plascon–argitektuurlesings, sowel as die twee argitektuurtoere na nuwe huise en selfs omskeppings van bestaande huise.

Anton Roodt van Die Roodt–Vennootskap in Bloemfontein is geen onbekende in die sentrale streek van Suid–Afrika nie. Die firma herdenk vanjaar sy 25ste bestaansjaar. Die vennootskap het oor die jare veral bekendheid vir restourasie en bewaring verwerf. Hieronder tel natuurlik die Ou Presidensie in Bloemfontein. 'n Omskepping van 'n bestaande woonhuis – Huis Pienaar – was voorheen deel van die huistoere. Roodt se kennis oor huise strek van strandhuise, dorpshuise en plaashuise tot woonstelle en vele meer. Die titel van die lesing is 'n Tuiste is nie 'n huis nie.

Die Roodt–Vennootskap is nou by verskeie hoêprofielgeboue in die Vrystaat betrokke. Kontemporêre argitektuur word uitgeleef deur die gebruik van tipies tradisionele Vrystaatse boumateriale. Hierdie firma het nie minder nie as sewe eerbewyse vir sy projekte oor die jare heen ontvang.