Belastingbetalers dok op
May 13 2008 01:53:10:473PM  - (SA)  
Tharine Geldenhuys

Druk artikel   E-pos storie aan 'n vriend

Luidens ’n DA-verklaring het die Moqhaka-raad nie sy goedkeuring gegee of begroot vir die skouspel nie. Opposisiepartye, wat die DA en Vryheidsfront Plus (VF+) insluit, het die skouspel se aanbieding ten sterkste teengestaan. Altesaam R1,4 miljoen is aan Owami betaal voordat enige diens gelewer is. Die geld is glo gefinansier uit MIG-fondse.

Mnr. Thabo Grimbeek, DA-raadslid, sê die skouspel is op ’n ondeursigtige wyse gereël, betalings is op ’n ondeursigtige wyse goedgekeur en uitbetaal en word op ’n ondeursigtige wyse nou deur prokureurs ingevorder.

“Ons voorspelling is hier gaan ’n toesmeerdery kom en daar sal nie veelkom van die sogenaamde regsaksies wat beoog word nie. Te veel mense het in die koek gedeel. Gerugte doen ook die ronde die bande waarop die voorlegging vir die skouspel gedoen is, het weggeraak,” sê Grimbeek.

“Die ironie is die munisipale bestuurder, mnr. Mokete Duma, gaan glo die sakeman deur die munisipaliteit dagvaar, omdat hy nie sy beloftes nagekom het nie. Die vraag wat die DA vra is: Hoe kan ’n plaaslike munisipaliteit vooruitbetaal vir dienste wat nog nie gelewer was nie?” vra Grimbeek.

“Die dagvaardiging beteken die belastingbetalers van Moqhaka sal nog verder moet opdok vir regskostes wat hieruit gaan voortspruit. Die politici en amptenare van die ANC wat betrokke was by die reëlings en onregmatige, vrugtelose uitgawes van die belastingbetalers se geld behoort tot verantwoording geroep te word om die geld aan die raad terug te betaal,” sê hy.

Na bewering het die raad ’n virement goedgekeur waardeur geld van die een posnommer na ’n ander posnommer oorgedra geword om vir die skouspeluitgawes, waarvoor nie begroot was nie, te betaal.

“Volgens wetgewing moet die raad binne sy bedryfsbegroting bly en mag nie oorbestee word nie. Daarom moes geld van poste wat bedoel was vir dienslewering geneem en oorgeplaas word na ’n posnommer vir die skouspel. Dit beteken R9 miljoen se vrugtelose uitgawes is aangegaan wat gebruik kon word vir die onderhoud van strate, voertuie of kapitale artikels soos broodnodige kompakteerders en onkruidbeheermiddels.

Die DA het beswaar gemaak en daarteen gestem dat enige raadsgeld tussen posnommers oorgeplaas word om vir die skouspel te betaal, sê Grimbeek.

Teken in op Volksblad