SVOK op die been gebring om opkomende boere te help
Mar 17 2008 02:19:42:430PM  - (SA)  

Druk artikel   E-pos storie aan 'n vriend

Die Sagtevrugte-produsentetrust (SPT) het ’n ontwikkelingskamer op die been gebring om opkomende boere te help en hulle volwaardig deel van bestaande bedryfstrukture te kry.

Een Vrystater, mev. Justina Mohali van Ficksburg, en drie Noord-Kapenaars, mnre. Albie Adams en Nelie Kok, albei van Keimoes, en Xeliwe Mathe van Riemvasmaak, sal hulle saam met leiers van ander provinsies hiervoor beywer, luidens die SPT en sy nuwe Sagtevrugte-ontwikkelingskamer (SVOK) in ’n verklaring. Die SPT sê hy wil opkomende boere help inskakel by bestaande bedryfstrukture vir sinvolle en volhoubare boerdery.

Opkomende boere sal streeksgewys georganiseer word vir voldoende verteenwoordiging op ’n nasionale bedryfsvlak.

“Die hoofdoel van SVOK is om as ondersteuningsraamwerk vir opkomende sagtevrugte-produsente te dien en om meganismes te ontwikkel om opkomende boere suksesvol in gevestigde bedryfstrukture te laat inskakel. Hulle sal ook gehelp word om die kundigheidsgaping te oorbrug wat tussen kommersiële en opkomende boere bestaan.”

Die SPT sal sekretariële en finansiële ondersteuning en dienste aan die SVOK lewer.

Teken in op Volksblad