Mbeki oorleef Rooi-aanslag
May 12 2008 02:09:19:487AM  - (SA)  
Jan-Jan Joubert

Druk artikel   E-pos storie aan 'n vriend

Dié versekering is gister op ’n nuuskonferensie in Johannesburg gegee deur mnr. Gwede Mantashe, sekretaris-generaal van die ANC, nadat die drie dele van die alliansie die naweek in Midrand vergader het.

Die SAKP het wel ’n versoek tot die beraad gerig dat Mbeki deur die ANC “teruggeroep” en dus vervang word, maar die versoek is deur die beraad afgewys.

“Daar is aspekte waaroor ons verskil, maar ons gaan hom nie in die beskuldigdebank plaas of van hom ’n sondebok maak nie,” het Mantashe geantwoord op bewerings dat Mbeki eersdaags uit sy pos gaan wees.

Die alliansievennote het wel laat blyk hulle is ontevrede met die Mbeki-regering se hantering van verskeie kwessies, soos die styging in voedsel- en brandstofpryse, hoë vlakke van werkloosheid, die kragkrisis en Zimbabwe.

Toe Mantashe gister op ’n mediakonferensie saam met mnr. Zwelinzima Vavi van Cosatu en dr. Blade Nzimande van die SAKP gekonfronteer is, het niemand die spanning ontken nie.

Dit is welbekend dat Mbeki tot dusver die ANC se versoek dat hy die huidige onderleier van die party, mnr. Kgalema Motlanthe, in die kabinet aanstel, ignoreer.

Motlanthe, wat die mediakonferensie uit die agterste gestoeltes dopgehou het, het geskerts dat hy eersdaags ’n parlementêre agterbanker gaan word.

Hoewel Mbeki as ANC-lid aan partydissipline onderworpe is, is dit net die president wat kragtens die Grondwet die prerogatief het om byvoorbeeld kabinetslede aan te stel of in die SAUK-raad in te gryp.

Mantashe het bevestig dat Mbeki ’n ontplooide kader van die ANC is, maar gesê dit moenie misverstaan word nie. Geen bevele sal aan hom gegee word nie. Versoeke sal wel gerig word.

Oor mnr. Jacob Zuma, ANC-leier, het Mantashe gesê “ons sal nie net saam met hom hof toe gaan nie, maar ook na die Uniegebou as die volgende president van Suid-Afrika”.

Toe hy gevra is wat sal gebeur as die korrupsiesaak teen Zuma nog aan die gang is teen die tyd van die verkiesing, het Mantashe gesê niemand weet hoe die hofsaak gaan verloop nie en die kwessie moenie verpersoonlik word nie.

“Die leier van die ANC sal aanstaande jaar die party se kandidaat vir die presidentskap wees.” 1 Die regerende alliansie gaan voortaan beter op nasionale, provinsiale en streekvlak saamwerk.

’n Beraad tussen die alliansievennote, spesifiek oor ekonomiese kwessies, word eersdaags gehou.

Kwessies wat sal aandag kry, sluit in die verhouding tussen die ANC en die regering, die SAUK-debakel, probleme met die Nasionale Vervolgingsgesag (NVG), Zimbabwe en “nuwe onthullings” oor die regering se omstrede wapentransaksie.

Teken in op Volksblad