Meisie se patent laat boere regop sit
May 13 2008 11:04:44:177PM  - (SA)  
Marisa Phillips

Druk artikel   E-pos storie aan 'n vriend

Elizna Boshoff (15) se patent om ’n bestaande snoeimasjien te omskep in ’n snoeimasjien wat telefoondrade kan oopsnoei, het stof in ’n hele paar van die ander deelnemers se oë geskop. Sy het ’n spesiale plek gekry.

Haar interessante patent het besoekers aan die Nampo-oesdag gister beïndruk.

’n Onderwyser van Elizna het haar aangemoedig om dié wetenskap-projek van haar vir vanjaar se Boerepatente-kompetisie op Nampo in te skryf.

Sy het einde verlede jaar met haar navorsing vir die projek begin.

“My ouers boer met avokado-pere en neute by Tzaneen, so ek is maar ’n plaasmeisie in murg en been.”

Elizna het met haar patent die lemgedeelte van ’n vrugtesnoeimasjien aangepas om takke wat oor telefoondrade groei, af te knip.

Dit kan veral met groot sukses deur telefoonkontrakteurs gebruik word of boere kan self ook hul telefoondrade oopknip.

Die blondekop is glad nie skaam om belangstellende boere op Nampo se vrae te beantwoord nie. Flink vertel sy vir ’n ouerige boer die lemme word hidrolies aangedryf.

Sy sê dié snoeimasjien maak die werk baie doeltreffender en gerieflik. “Telefoonlyne kan hiermee ook teen baie laer koste skoongehou word.

“Ek geniet Nampo. Dit is ’n heel nuwe ervaring. Ek het vandag seker al 100 keer my patent aan belangstellendes verduidelik.”

Teken in op Volksblad