LUR moet R10 m. opdok
May 13 2008 11:00:51:783PM  - (SA)  
Mike van Rooyen

Druk artikel   E-pos storie aan 'n vriend

Dié bevel volg op ’n vroeëre bevinding dat die toestand van die pad, veral die hoogteverskil tussen die teerblad en die skouer van die pad in die omgewing waar die ongeluk gebeur het, ’n gevaar vir padverbruikers ingehou het.

Regter B.C. Mucumie het by ooreenkoms tussen die partye gelas benewens die R10 212 501 wat die LUR aan mnr. Berto Esterhuizen (26) moet betaal, moet hy ook aan sy pa, Theo, R278 499 vir mediese en ander koste vir sy seun se behandeling betaal.

Die LUR het reeds meer as R1 miljoen aan die pa betaal vir mediese en ander verwante koste.

Berto, destyds ’n student aan die Boland-kollege, was voor die ongeluk ’n goeie sportman.

Regter Mucumie het ook by ooreenkoms gelas die LUR moet R700 000 aan mnr. Renier Zietsman (26) betaal. Hy het onder meer nekbeserings in die ongeluk opgedoen.

Hy was, soos Berto en mnr. Ryno Adriaanse (25), ook ’n passasier in die BMW-motor wat laataand op 22 Junie 2001 op die pad omgeslaan het nadat die bestuurder vir ’n wildsbokkie uitgeswaai en op die skouer beland het.

Hulle was laataand van Bloemfontein op pad terug na Hartswater toe die ongeluk gebeur het.

Die LUR is ook vir die regskoste en koste vir deskundige getuies wat in die verhoor getuig het, verantwoordelik.

Berto is onbevoeg verklaar om sy geldsake te hanteer en mnr. J.F. de Beer is as kurator van sy boedel aangestel.

Berto se breinskade is sodanig dat hy geen aktiewe breinfunksie het nie.

Die verhoor om die kwantum van Adriaanse se eis teen die LUR gaan steeds voor regter Mochumie voort.

Volksblad verneem die partye het reeds geskik dat die LUR aan hom ook R700 000 betaal vir algemene skade en mediese koste. Oor sy eis van R3,2 miljoen vir verlies aan toekomstige inkomste, moet nog beslis word.

Hy het breinskade en rug- en nekbeserings opgedoen.

Teken in op Volksblad