Raadslede kry lekker geldelike meevallertjie
Jul 16 2008 10:52:01:050PM  - (SA)  
Hannatjie van der Merwe

Druk artikel   E-pos storie aan 'n vriend

Oorbetalings vroeër aan raadslede wat oor ’n tydperk weer afgetrek is om vir die munisipaliteit terug te kry, word nou as “onreëlmatig” beskou en moet aan die raadslede teruggegee word.

’n Verhoging in raadslede se salarisse is in 2006 vinnig deurgedruk en die te veel-betalings was toe glo weens verkeerde berekeninge.

’n Inligtingstuk aan raadslede sê die terugverhaling van die geld wat te veel betaal is, het in Oktober 2006 begin, maar het in die daaropvolgende Desember en Januarie nie voortgegaan nie omdat raadslede gevra het dit moet so gedoen word omdat van hulle die geld nodig gehad het.

In Februarie 2007 het van die raadslede gevra dat hul totale uitstaande bedrae van hul bonusse afgetrek word. In Junie 2007 is alle aftrekkings gestaak omdat die oorbetalings “gerehabiliteer” was.

Mnr. Lawrence Matsekete, ANC-raadslid, het nou in ’n dringende mosie op ’n stadsraadsvergadering gevra dat “ongemagtigde” aftrekkings vroeër van raadslede se salarisse weer aan hulle terugbetaal word.

Die motivering van die mosie lui: “Een of ander tyd in 2006 is raadslede te veel betaal en dié geld is daaropvolgend afgetrek.”

Matsekete het gesê dié aftrekkings was “onreëlmatig” en daar was geen raadsbesluit hieroor nie; die betaling was nie ongemagtigde uitgawes nie; en dat al die verkeerde aftrekkings dadelik aan raadslede herbetaal word.

Mnr. Ronnie Bauser, DA-raadslid, het gesê daar moet eers gekyk word wat is die situasie voordat moontlik verkeerdelik opgetree word, maar die plan is deurgedruk.

Raadslede het reeds boodskappe gekry om hul tjeks te gaan haal, hoewel die notule van dié vergadering nog nie een bekragtig is nie.

Die DA-raadslede sê hulle het raad gekry om nie hul tjeks te wissel voordat klaring hieroor gekry is nie. Hulle sê hulle is daar om die gemeenskap te dien, en nie te beroof nie.

Teken in op Volksblad