Rooi kaarte: Spelers tegemoetgekom
Jul 24 2008 10:15:20:580PM  - (SA)  
Marisa Phillips

Druk artikel   E-pos storie aan 'n vriend

In ’n verklaring deur die Griffons A-liga-hoërskole-rugbyvereniging sê mnr. Chris Verhoef, voorsitter, ’n deeglike ondersoek is na die wedstryd gedoen.

Hy sê Saru verskaf voorskrifte ten opsigte van strawwe vir verskillende rooikaart-oortredings wat deur dié vereniging streng toegepas word.

Hy sê al die spelers en hul verteenwoordigers kon op ’n vergadering van langer as 90 minute getuienis ter versagting lewer.

“Dit word betreur dat ’n skolewedstryd só ontaard het dat die skeidsregter die wedstryd moes stop. Daar is egter baie versagtende omstandighede wat in ag geneem is voordat die finale straf van die spelers bepaal is.”

Die spelers se name word nie bekend gemaak nie.

Verhoef sê speler A, wat ’n teenstander rondgepluk het, se rooi kaart wat hy gedurende die wedstryd gekry het, word as genoegsame straf beskou en die Saru-voorskrif dat hy vir een wedstryd geskors word, word opgeskort.

Spelers B en C, wat mekaar geslaan en getrap het, is vir vier wedstryde geskors, waarvan drie opgeskort is.

Speler D, wat die skeidsregter verbaal aangeval het, is vir vier wedstryde geskors, waarvan twee opgeskort is.

Die vyfde speler wat die skeidsregter aan die bors gegryp het, word vir vier wedstryde geskors.

Verhoef sê dit moet in ag geneem word dat daar nog net vier moontlike wedstryde in die liga vir 2008 oor is.

“Die komitee kon geen bewyse vind dat enige spelers of beamptes tydens die wedstryd rassistiese opmerkings gemaak het nie en dit wil voorkom of dit moontlik afkomstig was van ’n toeskouer wat op die veld gehardloop het nadat die vierde rooi kaart uitgedeel is.

“Die wedstryd is regstreeks ná dié voorval gestop. Dit het aanleiding gegee tot die voorval waarin die speler die skeidsregter aan die bors gegryp het.

“Die saak sal nie na die Skeidsregtersvereniging en die Griffons se Senior Bond verwys word nie.”

Teken in op Volksblad