Kalahari-Kuierfees spring jolig weg
Sep 04 2008 11:34:44:870PM  - (SA)  
André Botha

Druk artikel   E-pos storie aan 'n vriend

George Meiring het met onder meer ’n keurspel van Afrika-liedjies die toeskouers by die Absa-Vryverhoog agter die burgersentrum aan die dans en in ’n feestelike stemming gekry. Plaaslike kunstenaars, soos die Ubun2 Breakdance-groep, het verder ’n jolige stemming hier verseker.

Op Die Eiland was dit veral die kinders se dag. In die kindertent het kinders allerlei lewenslesse, soos die gevaar van alkohol en sigarette, op ’n prettige wyse geleer.

Die voël- en slangkenner Bryan Vorster het ’n groot groep kleuterskoolkinders gisteroggend eers meer van voëls geleer. Die kinders het grootoog toegekyk hoe onder meer ’n pelikaan, valk en Kaapse aasvoël vlak oor hul koppe vlieg.

Boemsie die Nar en Mr Magic het die kinders ’n uur lank met hul manewales en toertjies bekoor, en die sangeres Etha het ’n klompie van hulle die kans gegee om hul danstalent ten toon te stel toe hulle as haar dansers tydens ’n sangnommer kon optree. ‘n Paar treffers van toeka het ouer lede van die gehoor ver laat terugdink.

In die middagvertoning, waar Williams sy versameling slange vertoon het, het die kinders haastig geskarrel toe Williams van die verhoog stap met ’n molslang, sodat die kinders daaraan kon vat. Die idee het hulle nie geval nie en hulle het liewers koers gekies. Eers met Williams – en die slang – weer veilig op die verhoog, het hulle na hul sitplekke teruggekeer.

Die fees kry vandag verdere momentum wanneer kunstenaars soos Arno Jordaan, Willem Botha, Robbie Klay, Wicus van der Merwe en Thys die Bosveldklong optree.

Laurika Rauch lewer vanaand haar gebruiklike kragtoer wanneer sy in die Fanie Malan-saal sing.

Teken in op Volksblad