Kleinseun maak Riaan 'n nar
Oct 04 2008 12:57:50:383AM  - (SA)  
Susan Cilliers

Druk artikel   E-pos storie aan 'n vriend

Só het die nuusleser gister geskerts oor sy eerste kleinkind, Tiaan. En al is die kleintjie nog nie eens ’n jaar oud nie, hoor hy reeds Haas Dasstories, bieg Cruywagen.

Die Internasionale dag vir Grootouers word môre gevier. Dr. Zola Skweyiya, minister van maatskaplike ontwikkeling, het ’n beroep op Suid-Afrikaners gedoen om dié dag ook te vier en so aan ouer mense hulde te bring vir die bydrae wat hulle tot die samelewing gelewer het en steeds lewer.

Tiaan is die seun van Cruywagen se dogter, Anita. “Ek sou nooit kon dink dat ek ook eendag allerhande dingetjies met my kleinkind sou doen soos om met hom rond te stap, dinge vir hom te wys en in ’n snaakse stemmetjie te praat nie. Dis ongelooflik,” is hoe Cruywagen sy lewe as oupa beskryf.

Gelukkig kan hy die klein mannetjie gereeld sien, want dié woon ook in Johannesburg.

Die Verenigde Nasies het 1 Oktober tot internasionale dag vir ouer mense verklaar, en ook besluit die eerste Sondag in Oktober sal aan oupas en oumas gewy word. “Ouer mense is die hoeksteen van baie gemeenskappe en huishoudings in Suid-Afrika. Baie grootouers sorg vir hul kleinkinders. Pleks daarvan om af te tree, word hulle ouers vir kinders wie se ouers nie na hulle kan kyk nie weens onder meer MIV/vigs,” het Skweyiya gesê.

“Ouer mense is ook die bewakers van ons erfenis, ’n bron van kennis en die draers van tradisies.” In Suid-Afrika kry 2 317 540 mense ’n ouderdomspensioen van die staat.

Die nasionale viering van grootouerdag vind môre om 10:00 by die Apostoliese Geloofsendingkerk in Atteridgeville, Pretoria, plaas. Skweyiya gaan ook daar wees.

Teken in op Volksblad