Repokoers bly vir eers onveranderd
Oct 09 2008 10:54:52:860PM  - (SA)  
Elma Kloppers

Druk artikel   E-pos storie aan 'n vriend

Die Reserwebank se monetêrebeleidskomitee het gister besluit om die repokoers (die koers waarteen die Reserwebank aan banke geld leen) onveranderd te hou op 12%. Dit beteken die prima- en verbandkoers bly onveranderd op 15,5%.

’n Verlaging was hoogs onwaarskynlik, al het ander lande die afgelope dae hul rentekoerse verlaag.

“Die monetêrebeleidskomitee se doel bly steeds om inflasie in toom te hou,” het mnr. Tito Mboweni, president van die Reserwebank, gister met die bekendmaking van die rentekoersbesluit gesê.

Die swakker rand die afgelope dae en die jongste inflasiesyfers – dié van Augustus wat op 13,6% opnuut ’n hoogtepunt bereik het, gee die bank min beweegruimte om die rentekoers nou al te begin verlaag.

Hoewel gister se aankondiging die rentekoersrisiko vir die huismark aansienlik verminder, meen kenners dié risiko word bloot vervang deur die uitkringende krisis in die Amerikaanse huismark en finansiële sektor.

Mnr. John Loos, eiendomsontleder by Eerste Nasionale Bank se huisleningsafdeling, sê daar is geen twyfel dat die internasionale krisis ’n risiko vir ekonomiese groei inhou nie.

“Hoewel Suid-Afrika nie ’n regstreekse blootstelling het aan die “giftige” bates in die Amerikaanse skuldmark nie, is die Suid-Afrikaanse ekonomie en huismark via die makro-ekonomie aan die risiko’s blootgestel.”

Die meeste ekonome verwag dat rentekoersverligting eers teen April volgende jaar sal kom.

Teken in op Volksblad