Meisie (18) van Bfn sterf ná botsing teen boom
Oct 12 2008 11:04:51:490PM  - (SA)  
Sandra Mulder

Druk artikel   E-pos storie aan 'n vriend

Me. Michelle Groenewald (18) van die Hoërskool Jim Fouché is dood ’n ruk nadat sy en haar broer, Michael Groenewald (22), teen ’n boom gebots het.

Hulle was Saterdagaand kort voor middernag in ’n metaalgryskleurige Nissan in Olive Grinterweg in Fichardtpark onderweg toe die bestuurder glo beheer verloor en teen ’n boom op die sypaadjie gebots het.

Volgens mnr. Thys Klopper, paramediese beampte by ER24, het Michelle kopbeserings opgedoen. Sy en haar broer is na die Life Rosepark-hospitaal gebring, waar Michelle ’n paar uur later dood is.

Volgens me. Esmarie Cronjé van die Rosepark-hospitaal is Michael gister geopereer.

Sy toestand was stabiel ná die operasie. Hy het ’n ligte skedelbasis-fraktuur en ook femurnekfrakture opgedoen. Sy lewer het ook seergekry.

Hy word in die multi-intensiewesorgeenheid behandel.

Michelle was na verneem word twee jaar gelede in ’n motorfietsongeluk betrokke, waarna sy goed van haar beserings herstel het.

Kapt. Chaka Marope, polisiewoordvoerder, sê die broer en suster se ouers was na verneem word in Johannesburg toe die ongeluk gebeur het.

Teen druktyd kon Volksblad geen verdere besonderhede bekom nie.

Teken in op Volksblad