Die raadslid van die wyk, mnr. David van Vuuren, gaan ook nou kyk na die hersonerings- en titelvoorwaardes, asook die boubeperkings.

Mev. Heleen van Zyl van Reveillesingel 4, een van die ontstelde inwoners, het ’n afskrif van hul versoekskrif wat deur 12 inwoners van die singel onderteken is, en waarin dringende vertoë gerig word aan Ons Stad oorhandig.

Die versoekskrif is aan raadslid Van Vuuren oorhandig en afskrifte is aan die direkteur regsdienste van die Mangaung-munisipaliteit dr. K. Brummer, senior bouinspekteur mnr. E. Tyu en bouinspekteur mnr. Jakes Jacobs gestuur. Hierin word ook na die vroeëre berig in Ons Stad van Donderdag 1 Mei oor die aangeleentheid verwys.

Die beswaarmakers vra in die brief die datum waarop die hersonering van die grond plaasgevind het, en dat ondersoek gedoen moet word oor veral die terugval-klousule wat in die geval gegeld het en oor die datum van die hersonering waartydens ontwikkeling moes plaasgevind het.

Ook soek hulle bewys van geregis-treerde kennisgewing aan die inwoners wat reeds hier gewoon het tydens enige hersoneringstydperk.

Hulle vra ook dat ondersoek gedoen moet word na die boubeperkings en boulyne van die projek met betrekking tot die afstand aan die twee aangrensende wonings nr. 4 en nr.18 en verdieping-eenhede wat opgerig word.

Hulle vra dat ’n ondersoek moet kom na die titelvoorwaardes van gekonsolideerde erf 15925. Ook dat ondersoek na die bouregulasies met betrekking tot twee aangrensende wonings, nr. 4 en 18, gedoen moet word.

Daar moet ook ondersoek gedoen word na die skaduwee waarin die hele woning van nr. 4 verswelg sal word, ten opsigte van drie slaapkamers en sit/woonkamer van die huis en die belemmering van die uitsig, wat die eiendomswaarde drasties gaan laat verminder.

Ook moet ondersoek gedoen word na die skaduwee en uitsig wat woning nr. 18 gaan benadeel met betrekking tot die vermindering van die eiendom se waarde.

Die privaatheid wat geskend word van die huisbewoners in Reveillesingel, veral nrs. 4 en 18, moet onder die loep geneem word aangesien wooneenhede reg langs die aangrensende wonings opgerig sal word.

Dit word ongeveer 2,5 meter van die heinings af gedoen. Weens die hoogte van die eenhede verleen dit aan die bewoners daarvan toegang om direk in die erwe van wonings nr. 4 en nr. 18 te kyk.

Dié aspek sal beslis die eiendomswaarde van die twee wonings veral baie nadelig laat verminder, sê die bewoners.

Ook vra die inwoners dat ondersoek gedoen moet word na welke wyse die grond deur die ontwikkelaar bekom is en dat die ondersoek na infrastruktuur met betrekking tot toenemende verkeer, riool, regulasies en stormwater, ook ingestel moet word.

Teken in op Volksblad