NOORDKAAP:Biblioteek het roemryke geskiedenis
Aug 01 2007 02:07:38:743PM  - (SA)  
Hannatjie van der Merwe

Druk artikel   E-pos storie aan 'n vriend

By Kimberley se geskiedkundige en bekende Africana-biblioteek – ’n nasionale gedenkwaardigheid – is nóg geskiedenis gemaak toe die 120ste bestaansjaar van die gebou van dié biblioteek gevier is. Die verjaardag is gevier op ’n onthaal wat die trust van dié biblioteek en die Vriende van die Africana-biblioteek aangebied het.

Regter S.A. Majiedt, voorsitter van dié trust, het meer van die ryk geskiedenis van dié biblioteek vertel. Hy het gesê daar moet voortgegaan word om dié biblioteek te bewaar en dit moet toegankliker en bekender onder alle gemeenskappe gemaak word. Dit is ’n plek met almal se geskiedenis. Dié biblioteek behoort aan die mense van Kimberley.

Mnr. Stephan Welz, ’n trustlid, het dié biblioteek as een van die top- instellings in die land beskryf.

Hy het gesê ’n biblioteek is ’n dagboek van die menseras. Hierdie biblioteek is ’n dagboek van die mense van die Noord-Kaap. Dit is ’n wonderlike bron van inligting.

Hy het gesê dit is belangrik dat hierdie biblioteek nie net bekender onder swart mense moet wees nie, maar dit moet bekender in die res van die land en die wêreld wees.

’n Nuwe publikasie getiteld 50 years on the Diamond Fields 1870 to 1920 is terselfdertyd bekend gestel.

Dr. Oscar Sabatini het die byskrifte by die foto’s in die boek en die voorwoord geskryf. Die Africana-biblioteek het die foto’s verskaf en hierin het mev. Kokkie Duminy, die hoof van die biblioteek, ’n groot rol gespeel.

Teken in op Volksblad