NOORDKAAP:Fees voed siele in NK
Aug 01 2007 02:07:37:650PM  - (SA)  
Karen Ebersohn

Druk artikel   E-pos storie aan 'n vriend

Daar is glo ’n spreekwoord wat sê ’n nasie wat sy kuns versaak, versaak die siel van sy mense.

En om dié rede gaan daar ’n gróót kunstefees gehou word om na die siele van die inwoners van Kimberley en die Noord-Kaap om te sien.

Die dae aftel na die Gariep-kuns-tefees het begin. Vandag oor 29 slapies kan inwoners die kultuurdiere binne hulle wakker maak, die partytjieskoene aantrek en gereed maak vir die grootste saamkuier op die stad se kalender.

Eet dus liewer vir die volgende paar dae brood en drink water en spaar al die laaste sentjies vir die laaste naweek van dié maand.

Op dié fees se bekendstelling by die oop myn verlede week is een feit duidelik gestel: Die fees gaan die jaar groter wees as ooit met meer kunstenaars, meer stalletjies, meer pret en beslis meer plesier.

Die kunstefees spog die jaar ook met ’n paar eerstes.

’n Volledige en uitgebreide kinderprogram gaan vir die stad se woelwatertjies aangebied word. Dit sluit die hele Wielie Walie-televisiespan van ouds in.

Die Standard Bank-tent is ook ’n nuutjie. Die tent, wat kompleet in ’n teater omgeskep gaan word, gaan optredes van kunstenaars met groot talent moontlik maak. Die idee van dié tent is dat mense wie se voete moeg is ’n oomblik hier kan ontspan en die kunste kan geniet.

Optredes van kunstenaars waarna uitgesien kan word, is die van Chris Chameleon, Patricia Lewis, Jannie Moolman, Lize Beekman, Elzabe Zietsman en Soli Philander.

Toneelopvoerings soos die baie gewilde Groet die Grotman en Die Uwe Pottie Potgieter is ook op die program.

Vanjaar se feesplakkaat is deur mnr. Ashley Delport ontwerp. Die meerkatte op die plakkaat met hul sonbrille wys op die sosiale kant van die fees.

En met al dié dinge en wat beplan word, is dit geen wonder nie dat die fees se slagspreuk Kap ’n jol by die Gariepfees, is nie.

Moet ook nie die Absa-Volksblad-teetuin op die fees misloop nie.

Besprekings vir alle vertonings kan by Computicket gedoen word. Doen internetbesprekings by www.computicket.com. Volledige inligting is ook op die fees se webwerf by www.gariepfees.co.za beskikbaar, of bel 053-832-6342.

Teken in op Volksblad