Staan saam en wen, sê DIV
May 08 2008 01:05:52:377PM  - (SA)  
Susan Maré

Druk artikel   E-pos storie aan 'n vriend

Mnr. Danie Eichstädt, voorsitter van die DIV, sê dit is tot hiertoe en nie verder nie. Die skokkende inligting in die 2006-verslag van die Vrystaatse ouditeur-generaal noodsaak daadwerklike optrede om te probeer voorkom dat sake verder versleg.

“Die skrif is aan die muur omdat die munisipaliteit tegnies bankrot is en finansiële ondersteuningstelsels geen vertroue inboesem dat dit binnekort beter sal gaan nie. Laste oorskry die bates en laat die rooi ligte flikker. Ons gaan hulle versoek om die munisipaliteit se geldkrane toe te draai deur hul eiendomsbelasting eerder in ’n spesiale, wettige trustrekening in te betaal.”

Volgens Eichstädt oorskry die munisipaliteit se laste sy bates met R40 miljoen, terwyl uitgawes die inkomste met bykans R20 miljoen oorskry. Die gemiddelde betaalkoers was op 30 Junie 2007 slegs 42% – minder as die helfte van die verwagte inkomste het gerealiseer. Bohlokong is die grootste sondaar waar ongeveer R2 miljoen per maand nié ingevorder word nie.

Dit blyk verder dat statutêre verpligte beleggingsreserwes jaarliks gebruik word om hierdie tekorte te finansier.

Eichstädt sê uitgawes word beperk deur vakante poste nie te vul nie. As laaste uitweg sal inwoners hiervoor moet opdok met verhoogde tariewe. Die boere is op hul beurt vir die munisipaliteit ’n nuwe melkkoei wat op die horison verskyn.

“Kortom, die munisipaliteit se beheer oor bates is swak en so ook kontrole oor verkope van munisipale eiendom, water en elektrisiteit. Die verpligte interne ouditfunksie is gebrekkig en ondoeltreffend en daar bestaan geen bedrogvoorkomingsplan en/of rekenaarsekuriteit nie. Die rekenkundige stelsel word nie voldoende ondersteun deur goed geliasseerde dokumentêre bewysstelsels nie. Daarby is die tenderproses wederregtelik verwring, word geld onverantwoordelik verkwis en word foute wat uitgewys is in vorige ouditverslae nie reggestel nie. Die munisipaliteit gaan net voort.

“Dit het tyd geword vir die sluimerende belastingbetaler om sy of haar geld te laat praat deur die geldkrane toe te draai. Belastingbetalers wat bereid is om hul eiendomsbelastinggeld in ’n wettige trustrekening in te betaal om só die munisipaliteit tot beter dienslewering te dwing, word versoek om dringend met die DIV in verbinding te tree.

“Dit is noodsaaklik dat hierdie ’n massa-aksie moet wees om die gewenste uitwerking te verkry. Veertien dorpe in Suid-Afrika het reeds met sukses tot hierdie stap oorgegaan.

“Dit is ’n wettige aksie en belastingbetalers word nie aan enige regsoptrede of regskoste blootgestel nie.

“Die DIV gaan ook nie huiwer om strafregtelike klagtes by die polisie in te dien nie indien ons bewus word van enige wetsoortreding van enige amptenaar of raadslid wat verband hou met munisipale sake. Gestaafde inligting deur individue, maatskappye en instellings kan aan mnr. Corrie Craven besorg word. Die inligting sal omsigtig en vertroulik gehanteer word.

“Die DIV se wekroep, soos dié van die Nasionale Belastingbetalers-unie, is: ‘Staan saam, wen saam!’ ”

Bel Eichstädt by 082-336-2353 of Craven by 082-857-7714.