Man verskyn weer in hof
Nov 13 2008 01:17:38:487PM  - (SA)  
Vicus Bürger

Druk artikel   E-pos storie aan 'n vriend

In ’n ander voorval is mnr. Hein van Rensburg (25), ’n kennis van Du Plessis en voorheen van Bethlehem, onlangs in Bloemfontein weens die besit van dwelms in hegtenis geneem.

Du Plessis se verhoor is tot 3 Desember uitgestel, want die hof wil nog ’n getuie roep. Hy het voor landdros Estrelita von Maltitz verskyn en adv. Celeste Ferris het aangekla.

Du Plessis is einde Januarie op Bethlehem met ’n vloeibare middel, vermoedelik ’n dwelmmiddel wat verwant aan vloeibare ecstasy is, in hegtenis geneem.

Hy is vroeër op borgtog van R3 000 vrygelaat. Van Rensburg, vermoedelik ’n vriend van Du Plessis jr., is op 31 Oktober by ’n salon in Bloemfontein, waar hy ’n haarkapper is, in hegtenis geneem.

Sers. Thandi Mbambo, polisiewoordvoerder, sê die Bloemfonteinse honde-eenheid het inligting ontvang oor dwelms wat van Bethlehem na Bloemfontein per koerier vervoer gaan word.

Inspekteurs Lieb Liebenberg en Willie Swanepoel het die plek by die salon waar die pakkie afgelewer sou word, dopgehou. Teen 09:00 het die koerier opgedaag en die pakkie is afgelewer. Van Rensburg is toe in hegtenis geneem en het Dinsdag in die Bloemfonteinse landdroshof verskyn. Mbambo sê hy is op borgtog van R500 vrygelaat en sal weer op 25 November in die hof verskyn. Mbambo sê die middels is na ’n polisie-laboratorium gestuur.

Teken in op Volksblad