Druk artikel   E-pos storie aan 'n vriend

Verwante Berigte Fliekvlooi: Debbie doen 2008 (19/03/08) Fliekvlooi: Kyk nou net vir Unbearable Lightness se Tomas! (26/03/08) Blog: Fliekvlooi - Hoe om weer goed te word (12/03/08)

In ons samelewing bestaan daar glad te veel ongegronde stereotiperings. Soos dat verslaafdes noodwendig swakkelinge is. En dat alle Moslemvroue onderdanige, onderdrukte slagoffers is van ‘n patriargale stelsel. Nie dat ek nou die burka vir alle vroue wil aantrek nie, ek reken maar net dat daar soms leeuharte onder die doeke en sluiers van dié vroue klop.

Confessions of a Gambler vertel die verhaal van só ‘n vrou. En dit bevestig sommer ook weer die ou waarheid dat niemand te sterk, te gelowig of sommer kortweg net te goed is om verslaaf te raak nie.

Die hoofkarakter - interessant genoeg vertolk deur Rayda Jacobs, die skrywer van die oorspronklike (én bekroonde) boek - is ‘n dinamiese enkelma wat meestal selfgeldend en suksesvol is.

Abeeda is ‘n aantreklike, suksesvolle ma van twee volwasse seuns. Sy is diep gelowig, kniel elke dag 5 keer op haar gebedematjie, besoek gereeld die moskee - eerbiedig in haar dubbele kopdoek - maar kan ‘n lekker knoop los en diep aan haar sigaret teug as sy met haar vriendinne kaartspeel en sit en redekawel om die kombuistafel oor die alledaagse dinge wat deel is van die menslike toestand.

Dan ontdek sy ná ‘n tragiese voorval die plesiere van dobbel en sy beland op ‘n pad waar sy naderhand nie meer kan briek aandraai nie. Later kan sy - wat sltyd so getrou was in die uitlewing van haar godsdiens - nie eens meer bid nie. Sy lees die verse in die Koran waar die profeet dit duidelik maak dat dobbel ‘n gruwel in oë van God is, maar sy word kompulsief voortgedryf - met amper vernietigende gevolge.

In dié onafwendbare afwaartse spiraal beland sy in sulke diep finansiële waters dat sy haar seun uitbuit, geld van haar huiswerker leen, vervreemd raak van haar suster ‘n jarelange vriendin - en haar uiteindelik tot misdaad wend.

Nie dat dié fliek net vol gloom en doom is nie - inteendeel, daar is baie snaakse oomblikke, kleurvolle karakters en spitsvondige dialoog. Een van die snaaksste tonele is wanneer Abeeda met twee vriendinne afsit casino toe, stigtelik geklee met kopdoeke en al - maar met ontwerper gangster-donkerbrille op die neuse: vroue op ‘n mission...

Soos Laetitia Pople, kunsredakteur van Die Burger van Rayda Jacobs se spel skryf: “Dié skrywer en dokumentêre rolprentmaker het ‘n natuurlike aanleg vir toneelspeel. Haar Abeeda is ongekunsteld, ‘n vertolking wat die kyker só tuis laat voel asof jy saam met haar om haar kombuistafel kuier. Dié aanslag geld al die spelers... wat sommer so inval by Abeeda se huis - daar is nie oordadige grimering, kostuums of stelontwerp nie.”

Confessions of a Gambler is ‘n eerlike blik op meer as een tema. Buiten Abeeda se dobbelverslawing word daar ook geraak aan kwessies soos homoseksualiteit, die vigs-endemie, familie-intriges, vriendskap, gewetenskwellings oor die verloëning van haar eie integriteit sowel as haar geloofsoortuigings, en uiteindelik die moeisame pad terug na ‘n sinvolle lewe.

Vraag: is alle verslawings gelyk, of is party meer sielsvernietigend as ander? Ek sou graag ‘n paar opinies wou hoor...