Druk artikel   E-pos storie aan 'n vriend

Verwante Berigte Hollikaans: die wondere van die wêreldwye web (04/06/2008) Hollikaans: Al fietsende deur Amsterdam (29/05/2008) Hollikaans: Om te braai of te barbecue, dis die vraag (21/05/2008) Hollikaans: '94 was sommer anderdag! (08/05/2008) Hollikaans: Oranje Boven! (02/05/2008) Hollikaans: Die mooiste stad in Europa (23/04/2008) Hollikaans: Ek kan nie tou daaraan vasknoop nie! (16/04/2008) Hollikaans: Nou wys Nederland haar ware kleure! (09/04/2008)

Ek was nog nooit 'n groot aanhanger van rugby nie. Dit is veels te ingewikkeld en ek kan dit nie so maklik volg nie. Die mans is onnatuurlik groot, en die geskrum is vir my bietjie vreemd. Selfs die lynstaan het nog nooit vir my regverdig verloop nie.

Maar nou het ek 'n nuwe sport ontdek. Voetbal! (Of beter bekend in Suid-Afrika as sokker).

Hoewel my Afrikaanse kultuur nie eintlik voetbal-vriendelik is nie, geniet ek dit baie. En ek het gou agtergekom hoekom.

Dit is eenvoudig.

Een bal, met twee hokke. Elf manne met net een doel: om die bal in 'n hok te kry. En een punt per keer. Nie so moeilik soos rugby met al die verskillende punte vir verskillende dinge nie! Lekker maklik. O, en ook 'n maklik reël: moenie met jou hand aan die bal raak nie. Mooi. Selfs ek kan dit verstaan.

En die geel en rooi kaarte-ding het geen verduideliking nodig nie. Amper soos kleuters met die “supernanny” uit Engeland: Eers 'n waarskuwing, en dan mag jy nie meer saamspeel nie.

Die nuwe belangstelling kom natuurlik nie van nêrens af nie – dit is nou die EK (Europese kampioenskap) hier. En alles is alweer oranje! Selfs by die supermark kry jy nou vir elke 15 euro wat jy spandeer 'n gratis oranje leeuwelpie. Op die tv-advertensies word mense aangemoedig om van die welpies te spaar en dit dan orals vas te plak. (Kyk uit vir die vliegtuig aan die einde!) Wragtig, het ek vanaand 'n taxi gesien met een op die voorkant. Mini-maanhaartjies wapper in die wind soos wat hy in my straat af jaag.

Die ekwivalent van Eskom hier, deel selfs oranje “spaarlampe” uit. Dit herinner bietjie aan die rooiligdistrik, dus sal ek twee keer dink voor ek dit in my sitkamer inskroef. Maar dit is seker die idee wat tel, en dit laat die mense nadink oor die omgewing.

Die kampioenskap het nou pas maar begin. Maandagaand (vir Nederland) om presies te wees. Met Nederland teen Italië. En met Italië as die huidige wêreldbekerhouers, was dit nie 'n maklike taak nie. Maar Van Basten en Van der Sar (ek is trots: ek ken selfs al die name!) het goed gedoen, en die eindtelling was 3-0.

Vir Oranje.

Wat 'n mooi aand.

Die eindfluitjie het nog nie eers geblaas nie, toe toeter die trems, taxi's en fietse al buite my deur. 'n Man het sy kop by my venster ingedruk en my hare deurmekaar gewaai met 'n groot oranje tossel. En my buurvrou het “Gefeliciteerd” (gelukwensing) geskreeu met haar unieke en tog so herkenbare stem.

En Vrydag doen ons dit weer. Maar die keer teen die Franse.

Nou moet iemand nog net vir my “buite spel” verduidelik, want dit verstaan ek nog nie.

Enige vrywilligers?