Druk artikel   E-pos storie aan 'n vriend

Mnr. Charles Nqakula

As ’n hond se stert afgekap is, kry jy hom nooit weer aangelas nie: hy ontbind en keer terug tot stof.

Is dit wat inderdaad met Afrikaanssprekendes (van alle rasse en gelowe) onder die “demokratiese” ANC-bewind aan die gebeur is?

Meer verontrustend is dat daardie klaarblyklik afgekapte stert sy lot blykbaar gelate aanvaar. Daar word toenemend genoeë geneem met die opdwing van Engels aan Afrikaanssprekendes deur die regering en sy dikwels onbevoegde staatsliggame, al kom daardie “Engels” skaamteloos krom en skeef en al het daardie taal sy hedendaagse status juis deur kolonialisasie verwerf en al haat al wat swart Afrikaan is kolonialisme.

Die sakewêreld, verloopte Afrikaanse ondernemings ingesluit, wis ook toenemend Afrikaans uit deur onder meer toenemend in alle Afrikaanse media in Engels te adverteer wanneer Afrikaanse geld nagejaag word, ten koste van Afrikaanses en ons taal.

Het die Afrikaanssprekende sy trots ná 1994 sodanig verloor dat hy nou aanvaar die sogenaamde nuwe Suid-Afrika het op die lyk van Afrikaans tot stand gekom? Is dit hoekom ons vandag politiek leierloos is? Die ander etniese groepe het steeds hul tradisionele leiers, maar Afrikaanses leef in ’n vakuum waarin kultuur- en ander ad hoc-liggame kwalik die allesomsluitende leierskapsfunksie kan vervul. Het dit nie tyd geword om ’n oorkoepelende liggaam tot stand te bring wat die stem van alle Afrikaanses in die sogenaamde global village – miskien met behulp van ’n “internet-parlement” – kan uitdra nie, of leef ons nog in die waan dat die een of ander Miekie Muis-opposisieparty in die voorsienbare toekoms iets teen die ANC gaan vermag – of dat die ANC ooit na ons belange sal omsien?

Watter hoop het ons: 1. Met ’n minister soos Charles Nqakula wat Agri-SA se versoek al sedert Maart 2007 summier ignoreer om hulle dringend oor die toenemende misdaad en plaasmoorde te woord te staan? 2. Met die ministers van landbou wat haat teen Afrikaanse boere versprei? 3. Met mev. Naledi Pandor (minister van onderwys) wat aktief deelneem aan regsaksies teen Afrikaans in Ermelo?

Dit het tyd geword vir die J.B.M. Hertzogs en Jan Smutse in ons kubernetiese tyd om op te staan vir die oorlewing van Afrikaanses en hul taal.