Druk artikel   E-pos storie aan 'n vriend

Met rassisme so hoog op die Suid-Afrikaanse agenda is dit interessant om te sien wat in die verkiesingstryd tussen Barack Obama en Hillary Clinton in Amerika gebeur.

Vir die 13% Amerikaners wat swart is (African Americans), speel ras beslis ’n rol, want die oorgrote meerderheid stem vir Obama.

Ontledings van wit Amerikaners se stemneigings is meer kompleks. Ontleders stem saam dat die blouboordjiewerkers (dié wat minder as $50 000 per jaar verdien) vir Clinton stem terwyl die meer gegoede wittes geneig is om vir Obama te stem – wat die rede is hoekom Obama soveel meer geld vir sy verkiesingsveldtog het as Clinton.

Die blouboordjiewerkers meen duidelik Obama sal meer geneig wees om die behoeftige swart Amerikaners te help as die wittes. Hulle is dan sy betroubaarste ondersteuners; hy is per slot van sake “een van hulle”.

Die meer gegoede wittes (sakelui ensovoorts) glo weer die onervare Obama sal veel meer manipuleerbaar wees as ’n gesoute politikus soos Clinton en dat hulle hom makliker sal kan oorreed om wetgewing te bevorder wat hul doelwitte bevorder. Ook sien hulle groot voordele daarin om ’n swart president te hê: Dit sal ’n groot indruk op Afrikalande maak van waar Amerika al hoe meer grondstowwe moet invoer en verwerk ter bevordering van ’n ekonomie wat sukkel. Dit is tog onmoontlik om Amerikaners as rassiste of imperialiste te brandmerk as diepresident swart is!

Die rassekaart is tot dusver min gespeel in die stryd tussen Clinton en Obama. Dit sal sterk na vore kom as Obama die stryd om die presidentskap teen John McCain moet voer.