Druk artikel   E-pos storie aan 'n vriend

Dit was waarskynlik die kragtige pro-Afrikaanse brief van dr. P.F. Erasmus (Rapport, 4 Mei) en Madeleine Barnard se uitstekende ontleding in Perspektief van die “verdomming” van die media wat my radar ingestel het op die advertensies in Rapport se Loopbane 24-bylae.

Hier is ’n Afrikaanse koerant wat onomwonde pro-Afrikaans is (dink maar aan die ROF, rubrieke en redaksionele kommentaar) met agt volbladsy-advertensies in hoofsaaklik Engels.

So hoofsaaklik dat nie eens ’n halfbladsy met die paar Afrikaanse advertensies gevul sou kon word nie.

Wat verder opval, is dat die meeste advertensies van owerheidsweë kom wat duidelik Engels bo Afrikaans in ’n Afrikaanse koerant verkies. Boonop word met onder meer Afrikaanse belastinggeld daarvoor betaal.

Jammer, maar dit het nie sin nie.

Aansluitend hierby Barnard se vrees dat die media al hoe meer op wins ingestel is as op joernalistiek van hoë gehalte. Sou haar stelling: “Koerante is in die eerste plek ondernemings wat ’n wins moet toon en slegs daarna gehoor (kan) gee aan sosiale en kreatiewe gewete” so baie waar wees vir Afrikaanse koerante? Waar pas Rapport se “kulturele gewete” oor Afrikaans in wat die plasing van Engelse of Afrikaanse advertensies betref?

’n Mens is bewus van tegniese en koste-aspekte betreffende die produksie van ’n bylae soos Loop-bane 24 saam met Rapport se Engelse suster City Press se Careers 24. Maar my gevoel is dit is ten koste van Afrikaans.

Nee wat, Rapport. As die owerheid of sakewêreld dan toegelaat word om op jul advertensieblaaie die Queen’s language so in ons kele af te druk, is dit net nog ’n spyker in Afrikaans se doodskis en julle s’n.