02/05/2008 15:27 - (SA)
Waterkloof-vier se speurder aangekla
Sonja Carstens
Pretoria
Die private speurder wat vroeër deur die sogenaamde Waterkloof-vier aangestel is om bewyse in hul verweer te versamel, is nou self ’n verdagte in vermoedelik een van die grootste renosterhoringhandelsindikate ter wêreld.
Mnr. Johan le Grange het die afgelope week vlugtig in die landdroshof in Bronkhorstspruit verskyn op 43 aanklagte.
Die saak teen hom is oorgeplaas na die hooggeregshof in Bloemfontein. Hy moet op 5 Mei saam met mnre. Clayton Fletcher van Sandhurst Safaris, Gerhardus Saaiman van Saaiman Safari’s, Pieter Johannes Swart, Frans Andries van Deventer en Cumaran Moodley verskyn.
Agttien dossiere wat spruit uit beweerde voorvalle in ses provinsies word teen die vermeende sindikaat ondersoek.
Hulle staan voorlopig tereg op aanklagte van rampokkery, handel in renosterhorings en regsverydeling.
Minstens 22 witrenosters met ’n geraamde waarde van sowat R3,3 miljoen is na bewering geskiet sodat hul horings bekom kan word. Die horings, wat na raming vir sowat R20 000 per kilogram verkoop word, is glo in die buiteland verkoop. Die moontlikheid word ondersoek dat nóg renosters van kant gemaak is.
Die twee renosterjagters Deon van Deventer en Nick van Deventer, broers van mnr. Frans Andries van Deventer, is vroeër tronk toe gestuur nadat hulle pleitooreenkomste met die staat gesluit het.
|
Kies jou skool se provinsie
