Druk artikel   E-pos storie aan 'n vriend

Iron Man (8 uit 10)

Regie: Jon Favreau.

Met Robert Downey jr., Terrence Howard, Gwyneth Paltrow, Jeff Bridges.

Sedert die eerste primitiewe mense bewus geword het van hul sterflikheid en na antwoorde op hierdie tydelike bestaan gesoek het, het die mens superhelde of gode geskep wat in verhale rondom heilige vure aan volgende geslagte oorgedra is.

Die Grieke het Herkules gehad, die Jode Simson en die Chaldeërs Gilgamesj.

Die Amerikaanse geskiedenis is deurspek met helde soos Wyatt Earp en Wild Bill Hickok, terwyl die Lone Ranger en Zorro die eerste gemaskerde helde was.

Toe het Superman en Batman hul verskyning gemaak. Die meeste van hierdie moderne superhelde het ontstaan danksy ’n fratsongeluk, kom van ’n ander planeet af of is deur ’n radioaktiewe spinnekop gebyt.

Dit weerspieël die mitologiese held of god wat van buite af moet ingryp om die mens te red.

Teenoor hierdie mitologiese helde/gode staan Iron Man, die rasionele, tegnologiese en eiegemaakte superheld. Iron Man is die nuutste van Marvel se superhelde wat ’n nuwe lewe op die silwerdoek gegun word.

Spider-Man, X-Men, die Fantastic Four, die Hulk en Daredevil is vorige grootskerm-inkarnasies.

Die verhaal is eenvoudig: Tony Stark (Robert Downey jr.) is ’n middeljarige Amerikaanse wapenvervaardiger wat in Afganistan ontvoer word om ’n wapen vir ’n onafhanklike groep terroriste te vervaardig.

In stede van ’n wapen vir die terroriste maak Tony ’n metaalpak wat hom sal help om te ontsnap en te dien as prototipe vir sy uiteindelike Iron Man-pak.

Nou is dit nie meer die mitologiese god of held van buite af wat mense (deus ex machina) uit die moeilikheid help nie, maar die mens se eie vernuf en vindingrykheid. Die superheld het die rasionele vlak van ontwikkeling bereik.

Soos dit elke goeie superheld betaam, het Iron Man ook ’n aartsvyand.

Ná sy ontsnapping en terugkeer na sy paleis van ’n huis in Malibu kondig Tony aan dat Stark Industries nie meer wapens sal vervaardig nie.

Nie almal is gediend daarmee nie en probeer dit keer. Iron Man se vyand kom van dié wat geld en mag bo mense stel en hy sal oud en jonk oortuig wat dit beteken om waarlik ’n held te wees.

Dit wys dat ons minder op superhelde en eerder op ons eie vermoëns en soms ook op tegnologie moet staatmaak.