Druk artikel   E-pos storie aan 'n vriend

Pretoria

Nie hekkies, gewigstoot, verspring of spiesgooi is ’n probleem vir Kim Ludick (18) nie. Dis onder meer van die sewekamp-items vir o.19 meisies waarin sy uitgeblink het by die Suid-Afrikaanse kampioenskappe vir juniors wat by Tuks gehou is.

Kim, ’n matriekleerling aan die Hoërskool Waterkloof, het haar naaste teenstander met omtrent 200 punte geklop. Verlede jaar was sy tweede.

Van al die sewekamp- items geniet Kim spiesgooi die meeste. Sy reken dis die grootste uitdaging, maar sy het die tegniek onder die knie gekry.

Die sewekamp word oor twee dae beslis en Kim sê aan die einde van die taai stryd is almal groot maats.

Sporttalent is definitief in Kim se gene. Haar pa, Edwin, was ’n Springbok-atleet, haar oupa, Willie, ’n Springbok-bokser wat ook in die beroepskryt naam gemaak het en haar kleinsus, Sasha-Lee, is tans die naasbeste o.17-sewekamp- meisie in Suid-Afrika. Kim is vanjaar Klofies se eerste netbalspan-kaptein en speel al vyf jaar vir Gauteng-Noord.

Kim is ’n onderleier vir sport in haar skool, maar ook ’n slimkop wat jaar ná jaar een van die toptien- akademiese presteerders daar is.

“Mens moet alles wat jy doen, voluit aanpak,” sê Kim. “Ek wil volgende jaar vir ’n B.Com-graad in hotelbestuur by Maties gaan swot. Ek sal nog sewekamp doen, maar ek wil nog ver gaan met my netbal.”