Druk artikel   E-pos storie aan 'n vriend

Sr. supt. Rienette Pieterse lei haar span deur die strate van Hatfield om misdaad te voorkom. Foto: Craig Nieuwenhuizen

Pretoria

’n Span van tien polisielede en burgerlikes patrolleer sedert 18 April op Vrydae die strate van Brooklyn en Hatfield te voet en op fietse. Hulle is deel van die Brooklyn-polisiekantoor se Misdaadbekamping-fiksheid-Vrydag-veldtog.

Die span het dié week twintig splinternuwe fietse ontvang waarop die veertig vrywilligers op ’n rotasiegrondslag patrolliewerk in die omgewing doen.

“Ons het die veldtog begin om misdaad te bekamp en terselfdertyd ons polisielede te help met hul fiksheid,” sê sr. supt. Rienette Pieterse, hoof van misdaadvoorkoming in die Brooklyn-polisiekantoor. “Verder probeer ons die publiek bewus maak van misdaad sodat ook hulle hul kant kan bring om dit te bekamp.”

Die patrollielede is op Vrydae tussen 09:00 en 11:00 op straat en weer tussen 13:00 en 15:00. Dis tye wat geïdentifiseer is as hoërisikotye vir misdaad wat inbrake by motors, dwelmhandel en rooftogte insluit.

’n Polisielid met ’n vuurwapen en radio vergesel ’n burgerlike op die patrollie, wat gewoonlik oor 6 km tot 8 km strek.

“Die hele misdaadvoorkomingseenheid is deel van die patrollies en ook baie ander polisielede,” sê Pieterse. “Dit gee ons die geleentheid om met ander mense saam te werk en ek vind reeds ’n nouer band tussen die onderskeie lede.

“Die publiek het positief gereageer op die patrollies en ondernemings het aangedui hulle sal ons help met die instandhouding van die fietse.”

Pieterse meen misdadigers sien ’n motor wat aankom makliker en kan ontslae raak van dwelms voordat die motor stilhou. Die fietspatrollies bied ’n beter kans om misdadigers op heter daad te betrap. Een dwelmverwante arrestasie is reeds aangeteken.

“Ons sal binnekort terugvoering gee aan die hoofkantoor en hopelik sal die projek baie suksesvol wees,” sê Pieterse. “As dit hier werk, kan ek nie sien waarom ander polisiekantore dit nie ook kan gebruik nie.”