Druk artikel   E-pos storie aan 'n vriend

Johannesburg

Westdene se geveerde inwoners sal binnekort rustiger kan slaap, want die raadslid vir dié wyk, me. Cindy Grobbelaar, is besig met planne om die Westdenedam in ’n veilige hawe vir voëls te omskep.

Die voëlpark word met die hulp van BirdLife SA en dié se hoofborg, Sasol, tot stand gebring.

Volgens Grobbelaar word die draadheining rondom die dam reeds stuk-stuk deur ’n palissadeheining vervang.

Soos wat geld beskikbaar raak, sal ’n parkeerterrein van omgewingsvriendelike plaveiteëls gebou word, twee permanente voëlgidse opgelei en aangestel en ’n opvoedkundige sentrum waar kinders meer van die natuur kan leer, ingerig word.

Grobbelaar sê die voorkoms van misdaad in die gebied is een van die beweegredes vir die projek.

“Ongelukkig gebruik misdadigers die damterrein as ’n vinnige ontsnaproete. Dit is vir hulle maklik om oor die draadheining te spring en spore te maak. Hopelik sal dit end kry met die palissadeheinings.”

Die heining sal inwoners egter nie keer om die dam te gebruik nie. Hekkies sal op strategiese plekke aangebring word wat van soggens sewe-uur tot saans sewe-uur oopgesluit sal wees.

“Ek dink inwoners sal meer van die dam gebruik maak omdat dit, veral met die teenwoordigheid van die voëlgidse, veiliger sal wees.”

Sy beplan ook om inwoners se talente in te span met ’n driemaandelikse Art at the Dam, ’n platform vir plaaslike kunstenaars, asook ’n Kersfees in Julie, ’n lentefees en Kersliedere in November.

Prof. Gerhard Verdoorn, pas uitgetrede direkteur van Bird-Life SA, sê die dam het ’n ryke bevolking van veral watervoëls soos eende, kolganse en reiers, asook kenmerkende “stedelike voëls” soos vinke en houtkappers.

“Dit sal natuurlik goed wees as die oranjebors-kalkoentjie, wat verdwyn het namate verstedeliking rondom die dam plaasgevind het, deur die voëlpark teruggelok word,” sê Verdoorn.

Volgens Grobbelaar ontferm van die inwoners om die dam hulle oor die voëls as hulle seerkry of siek word.

“Mense versorg hulle totdat hulle beter is en laat hulle dan weer vry.”

cvanderw@rapport.co.za