Druk artikel   E-pos storie aan 'n vriend

Shianne Addinall (9)

Bronkhorstspruit

Dit is nie aldag dat ’n negejarige toegelaat word om aan ’n uiterste sportsoort deel te neem nie, veral nie ’n meisiekind nie.

Teen minstens 55 km/h moes Shianne Addinall (9) verlede naweek voet bo water hou toe sy aan die Suid-Afrikaanse kaalvoetwaterski-kampioenskapsbyeenkoms op die Bronkhorstspruitdam deelgeneem het.

Shianne, ’n leerling aan die Woodlands Internasional College in Boksburg, is die jongste lid van die Suid-Afrikaanse kaalvoetwaterskispan. Sy is die belowendste junior kaalvoetwaterski-deelnemer sedert Nadine de Villiers, die afrigter van die Suid-Afrikaanse kaalvoetwaterskispan, wat steeds die houer is van drie junior vroue- en drie ope vrouerekords.

Shianne het die sport as vyfjarige begin beoefen nadat sy gesien het hoe dit gedoen word. Haar mikpunt is om De Villiers se rekords van die afgelope tien jaar te laat spat.

Om haar doelwit te bereik, oefen Shianne elke naweek. Wanneer sy nie kaalvoet waterski nie, is sy besig met gimnastiek en ballet.

Maar dit is nie net Shianne wat verlede naweek beïndruk het op die ysige water tydens die kampioenskapsbyeenkoms, wat oor twee dae aangebied is nie. Toeskouers kon gou sien waarom Heinrich Sam (16), ’n leerling aan die Hoërskool Overkruin in Pretoria, en Garth Strydom (17), ’n leerling aan Grey-kollege in Bloemfontein, die boonste twee plekke op die wêreldranglys vir kaalvoetwaterski in die junior afdeling beklee.

Boonop is Heinrich en André de Villiers (20) ook onderskeidelik eerste en tweede op die wêreldranglys in die ope mansafdeling.

Verlede naweek het groot opwinding opgelewer toe André aanvanklik die wêreldrekord van 10 880 punte tot 11 100 punte verbeter het. Sy vreugde is gedemp toe Heinrich sy nuwe rekord laat spat het deur 11 300 punte aan te teken.

Hulle sal in Januarie volgende jaar aan die wêreldkampioenskapsbyeenkoms in Nieu-Seeland deelneem.

Die Suid-Afrikaanse kampioenskap se ope mansafdeling het geëindig met Heinrich in die eerste plek, gevolg deur André in die tweede plek en sy broer, Zane, in die derde plek.

In die junior mansafdeling was Pascal Bauwens die wenner, gevolg deur sy broer, Laurent, in die tweede plek en Wian Jacobs in die derde plek.