Druk artikel   E-pos storie aan 'n vriend

Jong Gert van Schalkwyk se loopbaan as ’n provinsiale rugbyspeler vir die Pumas is in die gedrang om redes wat niks met sy rugby te make het nie.

Die Mpumalanga-rugbyunie word hewig gekritiseer omdat hul haker een van die sogenaamde Waterkloof-vier is, die vier jong mans wat daaraan skuldig bevind is dat hulle sewe jaar gelede ’n onbekende hawelose man vermoor het toe hulle nog skoolseuns was. ’n Appèl is hangend.

Dis nie nou ter sake of dit billik of onbillik was van die Mpumalanga-rugbyunie om Van Schalkwyk te onttrek nie. Die eenvoudige feit is: die episode het gewys Van Schalkwyk en sy drie maats is gebrandmerk.

Op dieselfde manier as wat dáárdie video die vier gewese inwoners van Reitz Kamerwonings aan die Universiteit van die Vrystaat gaan agtervolg tot in lengte van dae. Selfs al word hulle aan niks skuldig bevind nie.

In die 1980’s het Robert McBride, ’n gewese MK-vegter, ’n bom met noodlottige gevolge in ’n kroeg vol mense in Durban laat onplof. Nie eens die amnestie wat hy hiervoor gekry het, kon hom bevry van die skadu van McGoo’s Bar nie. Kyk watter beroerde loopbaan het hy vandag.

In die naloop van die Reitz-debakel is dit wat nou met Gert van Schalkwyk by die Pumas gebeur het, vir ieder en elk ’n aanskouingsles in daardie ou-ou waarheid dat dade en besluite gevolge het.

Soms doen ’n mens in die hitte van die oomblik die verkeerde ding. Maar in die meeste gevalle het jy keuses. Dikwels tref die gevolg van een verkeerde besluit of daad jou jare later, wanneer jy dit die heel minste verwag of verdien.

Dit is ’n boodskap wat in dié dae maar weer deeglik by veral ons jong mense tuisgebring kan word. Wys die koerant met Van Schalkwyk se storie aan die kinders. Verduidelik die les. Dis baie meer konstruktief (en effektief ) as om te sit en kwaad word vir die uitdelers van kollektiewe skuld.

Die wêreld het vandag te klein geword vir enigeen om in weg te kruip. En tegnologie, danksy die internet, te indringend en te verfynd om reputasies en rekords te verberg.

Selfone met kameras en video, kringtelevisie en nuwe mediaverskynsels soos blogs en Facebook maak dit feitlik onmoontlik om in anonimiteit te skuil.