Druk artikel   E-pos storie aan 'n vriend

Die Mbeki-bewind se houding oor die reuse-vrag Chinese wapens en ammunisie wat vir Zimbabwe bestem is, is sprekend van die regering se lamlendige en beginsellose hantering van die situasie in Zimbabwe.

Die internasionale gemeenskap het geen twyfel oor die situasie in Zimbabwe nie: menseregteskendings is aan die orde van die dag en van demokrasie is daar nie meer sprake nie. Onafhanklike waarnemers is dit eens dat Zimbabwe nou in werklikheid ’n militêre regering het, met dié dat die vorige regering se termyn verval het, die verkiesingsuitslae nie bekend gemaak is nie en die land se soldate en polisie ’n skrikbewind voer – met pres. Robert Mugabe nou wesenlik ’n onverkose diktator.

Dit is rede genoeg vir Suid-Afrika om te weier dat die wapenbesending wat per skip in die Durbanse hawe aangekom het oor land na Zimbabwe vervoer word.

Die internasionale aksienetwerk oor klein wapens het, tereg, ’n beroep op Suid-Afrika gedoen om nie die besending deur te laat nie omdat dit hoogs waarskynlik is dat dit gebruik sal word in gewelddadige aanvalle op burgerlikes en die skending van menseregte.

Suid-Afrika se eie wapenbeheerkomitee is gekant teen wapenverskaffing aan “konflikstreke” en lande betrokke by “die sistematiese skending of onderdrukking van menseregte”.

Maar sonder om ’n oog te knip keur die beheerliggaam die deurtog van die wapens goed omdat hy nie “bewerings” in ag kan neem nie en daar bowendien nie ’n wapenverbod teen Zimbabwe is nie. Die verantwoordelike kabinetslede lig nie ’n vinger om te keer nie. Spesiale reëlings word selfs getref vir die vervoer van die wapens na Harare.

En in New York vra pres. Thabo Mbeki: “Wapens? Watter wapens?”

Niemand moet hieroor verbaas wees nie. Só leun Mbeki nou al jare agteroor om Mugabe ter wille te wees. Só is alle kanse om druk op daardie regering uit te oefen verby laat gaan. Niemand glo meer Mbeki is nog in staat tot die rol van eerlike bemiddelaar nie.

Die direkte gevolg van die vervoer van hierdie besending wapens kan bloed en lyke op die strate van Zimbabwe wees. Indirek is Suid-Afrika en die ander lande in die streek, asook die res van die internasionale gemeenskap, weens hul dadeloosheid in elk geval lankal aandadig aan wat in Zimbabwe gebeur.

Nou gaan net nog meer bloed vloei.