Druk artikel   E-pos storie aan 'n vriend

Die afloop van dié bisarre sage van die Chinese skip met wapens vir die onwettige Mugabe-regime het Suid-Afrikaners ’n hoopgewende sein gegee: ’n regering wat met ’n groot oormag regeer, kán tot orde geroep word.

Voordat die kaptein met sy sinistere vrag Vrydag die hasepad gekies het, het twee geestelikes ’n hofbevel in Durban verkry wat die aflaai van die wapens verbied het.

Die Anglikaanse biskop Rubin Phillips en mnr. Gerald Patrick Kearney, ’n voormalige hoof van die Diakonia Raad van Kerke, het in die Durbanse hooggeregshof aangevoer om wapens te laat gaan na ’n land waar omvattende skendings van menseregte gepleeg word, is “irrasioneel en onredelik”. Die hof het hulle voorlopig gelyk gegee. Tesame hiermee het die vervoerwerkers-vakbond Satawu verklaar sy lede sal weier om die vrag te vervoer. Dit nogal ’n Cosatu-vakbond.

Die hofinisiatief van die twee geestelikes en die verset?optrede van die vakbonde het gewys die gewone burgery is nie magteloos teen ’n abnormaal magtige regering nie. As die regering boonop skromelik verkeerd is – soos in die geval van die wapens vir Zimbabwe – dan is die kans op sukses soveel beter.

Die Grondwet en sekere ander landswette het betekenisvolle demokratiese ruimtes vir die burgery geskep om hulle teen staatsdwang te verset. Hulle moet net doeltreffend benut word.