Druk artikel   E-pos storie aan 'n vriend

Woorde kan nie die ramp, nee tragedie, beskryf wat by die Land Bank afspeel nie.

’n Kragtige instelling wat oor dekades heen met toewyding en kundigheid opgebou is om ’n lewenskragtige landbousektor vir Suid-Afrika te help verseker, is in veertien jaar van ANC-bewind feitlik ten gronde gerig.

SakeRapport berig vandag oor die wanbestuur, korrupsie en klaaglike ondoeltreffendheid wat ’n eens kapitaalkragtige helpende hand vir boere gereduseer het tot ’n korporatiewe bedelaar wat nie sonder aalmoese uit die staatskas sal oorleef nie.

Die tragedie is dat ’n Land Bank wat effektief en goed gefinansier gehou is, vandag in ’n uitstekende posisie sou gewees het om opkomende swart boere te help om kommersieel suksesvol te wees om Afrika se legioene van hongeres te voed en werk te skep. Pleks daarvan is miljarde verkwis op onsinnige projekte wat niks met landbou te make het nie, op selfverryking, bedrog en die opperste ondoeltreffendheid denkbaar.

Die Land Bank-skandaal is ’n enorme klad op 14 jaar van ANC-bewind. Daar is glo ’n regruk-poging aan die gang. Maar die verwagtinge moet baie beskeie wees. Daarvoor het die kultuur van nie-verantwoordbaarheid, die waarmerk van die ANC se regeerstyl, te diep ingesink. Dis mos altyd iets of iemand anders se skuld. Of die “kollektief” sal verantwoordelikheid aanvaar.

Eintlik is dit ’n wonderwerk dat Suid-Afrika nog hoegenaamd ’n kommersiële landbousektor het.