Druk artikel   E-pos storie aan 'n vriend

Op die oog af lyk Eskom se aankondiging dat beurtkrag gestaak word na goeie nuus, maar in werklikheid dwing dit net nuwe kwelvrae na vore oor sy hantering van die kragkrisis.

Eskom se rede vir die opheffing van beurtkrag – dat die verbruikers se besparing dit moontlik gemaak het – maak nie sin as ’n mens na die feite kyk nie.

Net die vorige week nog het Eskom self gewaarsku oor ’n drastiese kragtekort die res van dié maand. Dié probleem het skynbaar oornag verdwyn.

Die beurtkrag is ingestel om noodsaaklike instandhoudingswerk oor drie maande moontlik te maak om erge kragonderbrekings in die koudste wintermaande te voorkom. Eskom gee egter geen aanduiding wat dié situasie nou is nie.

Die onvermydelike vraag is dus wat die ware rede vir die opskorting van beurtkrag is. Een moontlikheid wat genoem word, is dat ontploffings by substasies daarop dui dat die verouderende infrastruktuur beurtkrag eenvoudig nie kan hanteer nie.

Eskom se kommunikasie laat veel te wense oor. Hy kan ten minste die publiek, van wie hy ’n 60%-tariefverhoging wil hê, deurlopend eerlik en volledig bly inlig oor die ware stand van sake. Al sal dit vir hom ’n verleentheid wees om toe te gee dat hy steeds nie raad weet met die kragsituasie nie.

Hopelik sal die kundigheid wat hy nou naarstig werf, help dat hy wel weer sy sake in orde kry.