Druk artikel   E-pos storie aan 'n vriend

Dis welbekend dat die ANC-regering die goed bedoelde waarnemings en raad van gewone wit Suid-Afrikaners ignoreer en minag. In die normale wêreld tel die meriete van ’n standpunt, nie die velkleur van die artikuleerder nie. Anders as in die ANC se bedompige wêreldjie.

Dit sal nietemin interessant wees om te weet hoe in die binnekring van die regerende party gedink word oor die verslag oor Suid-Afrika se ekonomiese koers wat die Harvard-universiteit se Sentrum vir Internasionale Ontwikkeling die afgelope week uitgereik het.

Die verslag bevat fundamentele kritiek op die wyse waarop die Mbeki-bewind swart ekonomiese bemagtiging (SEB) in Suid-Afrika toepas. SEB plaas ’n onregverdige bykomende belasting op maatskappye, dit gee die verkeerde boodskap aan wit gegradueerdes en bestuurders, dit dra by tot die uittog van kundiges en dit het in twee groot sektore van indiensneming, die landbou en die mynbou, gelei tot dalende indiensneming.

Niks hiervan is nuut nie, verskeie kundige Suid-Afrikaners en navorsers sê dit lankal. Maar nou kom dié wysheid van Harvard, Amerika se voorste universiteit, ’n “vriend” van die ANC en een van die eerstes wat in die apartheidsjare beleggingsanksies teen die ou regering ingestel het. Daarby het die regering self die Harvard-kenners aangestel.

Ons wag in spanning om te sien hoe die Mbeki-bewind en die ANC gaan reageer op hul Harvard-vriende se waarnemings wat so deurspek is met gesonde verstand.