Druk artikel   E-pos storie aan 'n vriend

Suid-Afrika se banke is glo van die winsgewendste ter wêreld. Ons swaar beproefde verbruikers sal hierop sê: geen wonder nie, ons bankkoste is dan van die hoogstes.

Daarom sal bankkliënte verlig wees oor die nuus dat die Mededingingskommissie se ondersoek na bankkoste binnekort ’n bietjie verligting kan bring.

As die aanbeveling geïmplementeer word oor die heffing van tariewe vir die gebruik van OTM’s, kan die talle gebruikers van dié bankgerief binnekort gesamentlik sowat R1 miljard minder aan OTM-gelde betaal.

Suid-Afrika se vier groot bankgroepe maak gereeld gewag daarvan dat mededinging in die sektor besonder straf is en dat dié mededinging ’n dempende uitwerking op bankkoste het. Tog oortuig hulle nie heeltemal nie. Daarvoor is daar te veel oëverblindery. Een bank sal byvoorbeeld spog sy diensgeld vir ’n bepaalde rekening is die laagste van almal. Maar dan is die geld wat hy op ’n ander bankdiens hef, weer heelwat hoër as dié van die ander.

Daar is begrip daarvoor dat Suid-Afrika se bankgelde ’n premie dra weens koste wat banke moet aangaan om hulle en hul kliënte teen misdaad te beskerm. Tog raak banktegnologie al hoe meer gevorderd. Waarom kan dit nie, soos in ander bedrywe, ook lei tot dalende koste vir die kliënt nie?

Die bankwese in Suid-Afrika het ’n hele paar eienskappe van ’n kartel. Ons banke kan gerus harder probeer om daardie persepsie te besweer.