Druk artikel   E-pos storie aan 'n vriend

Dit is kritiek belangrik watter posisie Suid-Afrika oor Zimbabwe gaan inneem op die beraad van die Afrika-unie (AU) wat dié week in Sjarm el-Sjeikh in Egipte gehou word.

Robert Mugabe gaan met ’n breë glimlag opdaag met die “uitslag” van Vrydag se “verkiesing” in sy sak. Hy gaan eis dat die AU sy “verkiesing” bekragtig, al was dit ’n klug en ’n oefening in bloedige intimidasie. In die naam van Afrika-solidariteit het die lamlendige ou AU al bedenkliker verkiesings goedgekeur. Die AU weet dit en Mugabe weet dit en daarom kan en sal hy aandring op dieselfde behandeling vir hom.

As die AU sy legitimiteit erken, word die verdoemende resolusie grootliks geneutraliseer wat die veiligheidsraad van die VN die afgelope week oor Zimbabwe aanvaar het. Suid-Afrika, ’n nie-permanente lid van die Veiligheidsraad, is ingebind in daardie resolusie waarin onder meer Vrydag se “verkiesing” verwerp word.

Maar dalk gebeur ’n wonderwerk en pres. Thabo Mbeki maak genoeg moed en integriteit bymekaar om sy stem te verhef teen ’n AU-posisie wat Mugabe kondoneer. Nie net sal dit moreel korrek en politiek dapper wees nie, dit sal ook die logiese konsekwensie wees van Suid-Afrika se stem in die Veiligheidsraad oor Vrydag se skynverkiesing en die bloedige geweld wat Mugabe teen sy eie mense toepas.

Dit sal egter, gegewe Mbeki se hantering van die Zim-krisis tot dusver, ’n baie groot wonderwerk wees.