Druk artikel   E-pos storie aan 'n vriend

Dit ’n hoogheilige en lamsakkige verskoning wat pres. Thabo Mbeki aanvoer hoekom komm. Jackie Selebi, die gediskrediteerde nasionale polisiehoof, se kontrak met ’n jaar verleng is.

Hoogheilig omdat Mbeki so ewe die regsreël voorhou dat iemand onskuldig is totdat hy skuldig bevind word.

Daarmee vergeet Mbeki gerieflik die langdurige pu-blisiteit oor die vriendskap met die bedenklike Glenn Agliotti wat Selebi so uitdagend uitgesaai het.

Geen mens met sulke verbintenisse kan geduld word in die amp van polisiehoof nie. Mbeki het ander mense om minder geldige redes in die pad gesteek, soos me. Nozizwe Madlala-Routledge, vorige adjunkminister van gesondheid, en adv. Vusi Pikoli, wat die Selebi-ondersoek gelei het, kan getuig.

Mbeki het ook geen probleem met die onskuldig-tot-skuldig-bevind-reël gehad toe hy mnr. Jacob Zuma uit die pos van adjunk-president gesit het nie.

Dis daarby lafhartig omdat Mbeki weet hy sal nie die finale besluit hoef te neem nie oor Selebi, wat hy so tot elke prys in sy pos probeer hou het. Wanneer dit weer ter sprake kom, sal sy ampstermyn verby wees.

Vir die belastingbetaler beteken dit R1 miljoen uit die staatskas aan Selebi se salaris terwyl hy op betaalde verlof is hangende sy hofsaak. Alles dui daarop dat uitspraak eers oor ’n jaar verwag kan word.

Erger: dis nog ’n aanslag op die moraliteit van die samelewing wat worstel om sy waardes te behou.

Die waarheid is dat Mbeki genoeg ander redes as die kriminele klagte teen Selebi en sy bedenklike vriendskapsbande gehad het om nie sy kontrak te hernieu nie.

Selebi kan sonder vrees vir teenspraak bestempel word as die onbekwaamste polisiehoof wat die land nog gehad het. Nie net het sy menseverhoudinge dikwels veel te wense oorgelaat nie (hy het ’n polisielid by geleentheid ’n gorilla genoem omdat sy hom nie herken het nie). In sy ampstermyn het interne ontevredenheid in die polisiediens en korrupsie toegeneem terwyl vaardighede drasties agteruitgegaan het. Bowenal het misdaadsyfers ongekende hoogtes bereik.

Mbeki se hantering van die Selebi-situasie, van sy aanvanklike staat van ontkenning tot sy skorsing van Pikoli en sy verwarrende verduidelikings agterna, sal vir altyd ’n skadu oor Mbeki se integriteit werp.

Eintlik moes die verlenging van Selebi se kontrak niemand verbaas het nie.