Druk artikel   E-pos storie aan 'n vriend

Die agtjarige Milla Peerutin met haar muffins. Foto: Deon Gurling

Die agtjarige Milla Peerutin kén van siek kinders. Haar ouer sussie, Alex, bestee baie tyd in die hospitaal en ’n vriend, Zachary Bloch, is in 2001, toe hy net ses maande oud was, met akute nierversaking opgeneem.

Zachary se ouers is goeie vriende met die Peerutins en Milla sien Zach se ma, Amanda, as ’n rolmodel.

Jonathan en Amanda Bloch is by geldinsamelingspogings betrokke en hulle het ná hul seuntjie se beterskap binne ses maande meer as R1 miljoen ingesamel om dankie te sê aan die hospitaalpersoneel.

“Ek wou self iets doen om siek kinders te help én ek wou ander mense inspireer om dieselfde te doen,” vertel dié graad 2-leerling aan Herzlia Primary High in Vredehoek.

’n Vriendin van haar, Tali, het een keer muffins op straat verkoop en net daar het Milla die plan gekry om dieselfde te doen en om dan die geld aan die Rooi Kruis-kinderhospitaal te skenk. “Hulle bou ’n nuwe teater en die geld is my deeltjie om dankie te sê dat hulle Zach gesond gemaak het,” verduidelik sy.

Milla en die gesin se huishulp, Jenny Mouers, is op “muffin-dae” al sesuur in die kombuis om te begin bak.

Milla se broer Max (6) is só gefassineer deur sy sussie se goeie daad dat hy homself as klitser aangestel het.

Milla verkoop die muffins teen R5 vir kleintjies en R10 vir grotes by haar ouers se kantore.

“Dit hang van die bestellings af, maar ons bak tussen 60 en 120 muffins op ’n slag,” vertel Milla trots. Haar kliënte kan kies tussen wortel-en-vanielje, semels-en- rosyntjies, en pekanneut-en-wortel.

Haar eerste mikpunt van R2 000 het sy binne drie maande bereik, waarna sy self ’n houertjie met die geld na die Rooi Kruis-kinderhospitaal geneem het om R2 242 aan hulle te oorhandig. “Die mense daar was baie gaaf en ook baie bly oor die geld. Hulle het vir my ’n sertifikaat gegee en my die hospitaal gewys,” sê sy.

Nou bak sy verwoed om haar volgende mikpunt – R4 000 – te bereik.

Milla sê sy het nog nooit die behoefte gehad om die geld op CD’s of ander bederfgoed uit te gee nie. “Ek help eerder ander mense as myself. En dis lekker om te weet ek kan ’n verskil in die siek kinders se lewe maak.”

* Mense in die middestad wat bestellings vir muffins by Milla wil plaas, kan ’n e-pos stuur na azraa@assocmags.co.za.