Erna van Wyk    

Druk artikel   E-pos storie aan 'n vriend

Westonaria

Op die sementstoep voor die drankwinkel in Glenharvie drom ’n groepie mans saam met ’n paar quarts Black Label.

Na die weste, oor die grootpad, is dit te ver om te sien of die skagtoring van die Kloof-goudmyn weer draai. ’n Skerp lig is egter waarneembaar in die verte.

Daar is krag en ’n week nadat die hele mynbedryf weens die elektrisiteitskrisis tot stilstand geknars het, het die eerste skof myners Donderdagaand weer in die skag afgesak.

Maar hier op die stoep is dit nie juis ’n troos nie. “Ons weet nie wat gaan gebeur nie. Ons raak baie bekommerd. Gaan ons geld kry?” sê mnr. John Moekwena, ’n 30-jarige myner wat net betaal word as hy werk.

Dit weergalm deur die parkeerarea soos sy kollegas dit beaam. “Al wat ons kon doen, was om te slaap,” sug mnr. Simon Dlamini terwyl hy sy Black Label na sy mond lig.

By die ingang van die kafee sê mnr. Dawid Janse van Rensburg, ’n kontrakteur wat by die Kloof-myn werk, baie myners het maar gaan visvang.

“Oor die toekoms? Ons weet nie wat gaan gebeur nie. Die meeste mense is nie net bekommerd oor hul salarisse nie, maar ook oor hul bonusse, daai bietjie ekstra geld waarmee jy jou skuld kan betaal,” sê dié pa van drie.

“Dit is die ergste krisis wat die mynbedryf die afgelope agttien jaar getref het,” sê Van Rensburg.

So 5 km verder in ’n kuierplek in Libanon, oftewel Skag 8, onthou mnr. Ray Clark 1991 – die jaar toe die goudbedryf byna ineengestort het en niemand gewerk het nie.

“Dit was die laaste keer dat daar so groot paniek was. Dit is dié paniek wat mense laat pak en loop. Dit raak nie net die myne nie, maar ook ander bedrywe wat van die myne afhanklik is.”

As ’n kontrakteur weet Clark alte goed wat die gevolge van die mynsluiting is. Sy maatskappy, soos ander kontrakteurs, is reeds aangesê dat hul kontrakte beëindig word. In Westonaria is daar 2 000 mense wat nou ’n ander inkomste sal moet kry, sê Clark.

* Die mynbedryf het die afgelope week ingestem om sy energieverbruik met 10% te verminder om weer ’n totale sluiting af te weer. Een myngroep, Harmony, het reeds gesê sy werkmag sal gevolglik ook met 10% verminder moet word.