Druk artikel   E-pos storie aan 'n vriend

Pretoria

Eskom gaan meer as 500 Suid-Afrikaners op ’n databasis van die Vryheidsfront Plus vir indiensneming oorweeg.

Die party het vroeër vandeesmaand ná die kragkrisis ’n reuse-kers en ’n lys van sowat 1 800 opgeleide mense aan Eskom oorhandig.

Dr. Pieter Mulder, VF Plus-leier, het toe gesê die krisis kan deels toegeskryf word aan Eskom se verlies aan vaardighede.

Die VF Plus-lys bevat onder meer 150 ingenieurs, onder wie talle elektriese ingenieurs, asook 92 mense met MBA-grade en 44 met doktorsgrade

Mnr. Mpho Letlape, besturende direkteur van Eskom se menslike hulpbronne, het Mulder die afgelope week in ’n brief bedank vir sy besoek en die lys van name.

Hy het gesê Eskom het die databasis ontleed en gaan 561 mense kontak en vra om hul CV’s te stuur sodat hulle vir indiensneming oorweeg kan word.

Nadat hul CV’s deurgegaan is, sal diegene wat lyk asof hulle die nodige vaardighede het, genooi word na ’n loopbaan-ekspo waar onderhoude met hulle gevoer sal word vir moontlike indiensneming.

Mnr. Willie Spies, VF-woordvoerder oor minerale en energie, het dié planne verwelkom.

“Dit wys daar is nog plek vir wen-wen-oplossings in ons land.”

Die VF Plus het in Oktober 2005 die webblad www.satalent.co.za begin om inligting te versamel van kundiges hier en in die buiteland wat werkloos of onderbenut is.

Dit was nadat die regering kundiges in ander lande wou gaan werf.

Ses weke nadat die databasis begin is, is die name van 500 Suid-Afrikaners wat sukkel om werk te kry aan adj.pres. Phumzile Mlambo-Ngcuka oorhandig. Die VF Plus het die inligting ook na personeelagentskappe gestuur.